Mahigit 3.7M ang nasayang na vaccine doses ang naiulat- Malakanyang

MAY KABUUANG 3,760,983 doses ang naitalang Covid-19 vaccine wastage o nasayang na bakuna sa bansa.

Ipinresenta ni acting presidential spokesperson Martin Andanar ang data na nagmula sa Department of Health sa isinagawa nitong public briefing, araw ng Miyerkules.

Sinasabing 1.54% lamang ito sa kabuuang COVID-19 vaccine doses sa bansa.

“Nasa 1.54% ng COVID-19 vaccines na binili ng national government ang masasabing wastage. Malayo ito sa 10% wastage rate ng World Health Organization,” ayon kay Andanar.

Kabilang sa mga dahilan para sa wastage o naaksayang doses ng bakuna ay “under-dosed vials, exceeded shelf life, presence of particles, destruction by disasters like fire and typhoons.”

Sa ulat, aabot sa 27 milyong doses ng bakuna kontra COVID-19 ang nakatakdang mag-expire ang bisa pagsapit ng buwan ng Hulyo ngayong taon, ayon kay Presidential Adviser for Entrepreneurship Joey Concepcion.

Nanghihinayang si Concepcion na hindi magamit ang mga naturang bakuna kung kaya’t hinimok nito ang mga wala pang booster shot na magpaturok na.

Samantala, hinikayat naman ni Andanar ang publiko na magpabakuna na at sundin ang health protocols sa gitna ng banta ng bagong coronavirus variant Omicron XE.

“Patuloy ang ginagawang pag-aaral sa XE bilang isang variant. Ang mahalaga ay sumunod sa minimum health standards, mag-mask, hugas, iwas, at magpabakuna,” ayon kay Andanar. (Daris Jose)