Malakanyang, pinayuhan ang mga employer na magtalaga ng health safety officer sa kanilang work place

UMAPELA ang Malakanyang sa mga nagmamay-ari ng kumpanya na gumawa ng kaukulang hakbang para masiguro na nagagawa ang pag- iingat sa kanilang work place.

Ang apela ng Malakanyang ay ginawa sa harap ng nagpapatuloy na pagsirit ng mga nadaragdag na kaso ng COVID 19.

Sinabi ni Acting Presidential Spokesperson at Cabinet Secretary Karlo Alexei Nograles, mas makabubuting magtalaga ang mga employer ng health safety officer sa kanilang mga tanggapan o sa mga lugar na nagsisilbing trabahuhan.

Magiging trabaho ng health safety officer na magpaalala sa mga empleyado at titiyak na nasusunod ang minimum public health standard.

“Sa mga pumapasok onsite, ilang paalala sa mga employer sa gitna ng pagtaas ng mga kaso ng COVID-19: Una, mag-assign po tayo ng health safety officer sa inyong workplace para ipaalala sa mga empleyado ang pagsunod sa minimum public health standards at mag-monitor at mag-track po tayo ng mga sintomas,” ani Nograles.

Aniya pa, bukod sa minimum health protocol ay dapat din aniyang masiguro na may bentilasyon ang mga work place at iwasan ang closed spaces.

“Pangalawa, tiyakin ang proper ventilation at iwasan ang closed spaces,” anito. (Bishop Jesus “Jemba” M. Basco)