Malakanyang, todo-depensa sa desisyon ng IATF na manatili ang NCR at iba pang lugar sa alert level 2 status

TODO-DEPENSA ang Malakanyang sa naging desisyon ng Inter-Agency Task Force for the Management of Emerging Infectious Diseases (IATF-EID) na panatilihin ang Kalakhang Maynila at karamihan sa lugar sa bansa sa ilalim ng Alert Level 2 status.

“Right now, hindi pa tayo handa na mag-declare ng any Alert Level 1 sa ngayon, ” ayon kay acting Presidential Spokesperson at Cabinet Secretary Karlo Nograles.

Aniya, isinasapinal ng IATF-EID ang parametro sa posibilidad na i- deescalate ang Metro Manila sa pinaka-mababang Alert Level 1 sa pamamagitan ng pag-assess sa average daily attack rate (ADAR) at health care utilization rate.

Gayunman, sinabi ni Nograles na kailangan pa rin na maging handa ang mga lokal na opisyal na magdeklara ng granular o localized lockdowns sa oras na tumaas ang Covid-19 cases sa isang partikular na lugar.

“Lahat ng mga LGUs (local government units), local chief executives lalo na mga mayors, mga governors, dapat nakahanda sila mag granular at localized lockdown kung kinakailangan. Reminder lamang, that’s part of Door No. 4 sa ating Four-Door strategy para mabantayan na hindi makapasok yung Omicron at iba pang mga variants of concern dito sa ating bansa,” ani Nograles.

“The Four-Door Policy covers border control, active surveillance including test and trace, early isolation and treatment of all those who tested positive, and the vaccination program,” dagdag na pahayag ni Nograles.

Ang Omicron variant, na unang natuklasan sa Botswana, Southern Africa, ay idineklara bilang variant “of concern” ng World Health Organization.

Sa kasalukuyan, wala pang naiuulat ang Pilipinas ng kaso ng Omicron variant of Covid-19 subalit kaagad namang nagpatupad ng travel restrictions sa 14 na bansa na mayroong “high risk of infection.” (Daris Jose)