Mayor Sara, ‘most qualified’ maging susunod na Pangulo ng bansa-Sec. Roque

NANINIWALA si Presidential spokesperson Harry Roque na si Davao City Mayor Sara Duterte ang “most qualified” na tao para humalili sa kanyang ama na si Pangulong Rodrigo Roa Duterte, sa Hunyo 2022.

Ang pahayag na ito ni Sec. Roque ay sa kabila ng naging pahayag naman ni Pangulong Duterte na hindi tatakbo sa pagka-pangulo ang kanyang anak na si Mayor Sara.

Sinabi pa ng Pangulo na ang presidency ay hindi trabaho para sa mga kababaihan dahil ang lalaki at babae ay mayroong magkaibang “emotional setup.”

“Malayo pa naman po ang eleksiyon, so tutok na muna tayo sa pandemya,” ayon kay Sec. Roque.

“Pero sa akin po, tingin ko si Mayor Inday Sara, siya ang pinaka-qualified, pinakahanda at, as the survey shows, kung tatakbo talaga siya siya talaga ang mananalo,” dagdag na pahayag ni Sec. Roque.

Kumpiyansa si Sec.Roque na gagawa ng tamang desisyon si Mayor Sara sa tamang oras at panahon.

“Tingin ko Inday Sara will make the right decision at the right time kung ano ang makakabuti sa kaniyang ama at kung ano ang makakabuti sa sambayanang Pilipino,” ayon kay Sec. Roque.

Lumitaw ang pangalan ni Mayor Sara bilang posibleng contender para sa presidency sa May 2022 election matapos na manguna ito sa pinakahuling Pulse Asia survey kung saan tinanong ang mga Filipino kung sino ang gusto ng mga ito na maging susunod na Pangulo ng bansa.

Nakiusap naman si Mayor Sara sa pollsters na huwag sama ang kanyang pangalan sa susunod na surveys. (Daris Jose)