No. 19 most wanted person ng NCRPO nalambat ng NPD sa Zambales

NATIMBOG ng mga awtoridad ang No. 19 most wanted person ng National Capital Region Police Office (NCRPO) sa kanyang pinagtataguan lugar sa Zambales City, Miyerkules ng gabi.

Kinilala ni District Special Operation Unit ng Northern Police District (DSOU-NPD) chief PLTCOL Jay Dimaandal ang naarestong akusado na si Jonard Manalo, 27, tubong Malabon City at residente ng Purok 6, Magsaysay Castillejos Zambales.

Base sa report ni PLTCOl Dimaandal kay NPD Director PBGEN Jose Hidalgo Jr, ang pagkakaaresto kay Manalo ay resulta ng Intelligence research at pinaigting na operation kontra most wanted person sa pamamagitan ng patnubay at matibay na pamumuno ni NPD Director PBGEN Hidalgo Jr, matapos ang natanggap nilang impormassyon mula QCDIT-RIU hinggil sa pinagtataguan ng akusado.

Agad bumuo ng team ang DSOU sa pamumuno ni PLT Melito Pabon sa ilalim ng pangangasiwa ni PLTCOL Dimaandal, kasama ang QCDIT-RIU, Zambales PIT-RIU3, RID NCRPO, Valenzuela CPS, Castillejos MPS, Zambales at DID-QCPD saka ikinasa ang joint operation na nagresulta sa pagkakaaresto sa akusado dakong alas-10 ng gabi sa kahabaan ng National High-way Brgy. San Juan, Castillejos, Zambales City.

Ayon kay DSOU investigator PCPL Josefino DC Estacio II, ang akusado ay inaresto sa bisa ng warrant of arrest na inisyu noong March 23, 2021 ni Hon. Judge Evangeline Mendoza Francisco ng Valenzuela City RTC Branch 170 para sa kasong Robbery with Homicide na walang inirekomendang piyansa.

Ani PLT Pabon, hinoldap ng akusado ang lola ng kanyang girlfriend na nangyari ang insidente noong 2020 sa Doña Elena St., Punturin, Valenzuela City subalit, nanlaban umano ang biktima kaya’t pinatay ito ng suspek. (Bishop Jesus “Jemba” M. Basco)