Pagpapaliban ng Brgy., SK polls lusot sa 2nd reading ng Senado

LUSOT na sa ikalawang pagbasa ang Senate Bill 1306 na nagpapaliban ng isang taon sa Barangay at Sangguniang Kabataan (SK) Elections.

Dalawa lamang sa mga senador ang bumoto ng No sa panukala na sina Senators Koko Pimentel at Risa Hontiveros.

Matapos ang ‘period of interpellation’ ay hindi na sumalang sa committee amendments ang panukala dahil ito naman ay substitute bill at agad ding dumiretso sa individual amendments.

Isang amendment ni Sen. Alan Peter Cayetano ang ipinasok ni Sen. Imee Marcos kung saan ipinadaragdag ang phrase na ang mga indibidwal na eligible na kandidato para sana sa December 5, 2022 Barangay at SK elections ay pinatitiyak na qualified pa rin sa halalang pambarangay at SK sa December 2023.

Hindi naman tinanggap ni Marcos ang pahabol na individual amendment ni Hontiveros na sa halip na December 2023 ay sa May 2023 idaos ang BSKE dahil naisara na ang botohan sa 2nd reading.

Sa ilalim ng panukala ay isasagawa ang Barangay at SK Elections sa ikalawang Lunes ng December 2023 at ang panunungkulan sa mga nahalal sa petsang ito ay magsisimula sa January 1, 2024.

Ang susunod naman na halalan para sa Barangay at SK ay gaganapin na sa ikalawang Lunes ng Mayo 2026, at mula sa petsa na ito ay idaraos na ang eleksyon tuwing ikatlong taon.

Ang mga maluluklok sa May 2026 ay mag-uumpisa naman ang panunungkulan sa June 30, 2026.

Base sa rules ng Senado, dahil pasado na sa ikalawang pagbasa kaya sa susunod na linggo ay maaaring maaprubahan sa ikatlo at pinal na pagbasa ang panukala. (Daris Jose)