‘Pang-4 lang si Rappler CEO Maria Ressa na convicted sa cyber libel case ‘di kauna-unahan’ – DoJ

Nilinaw ngayon ng Department of Justice (DoJ) na hindi ang CEO ng Rappler na si Maria Ressa ang kauna-unahang Filipino journalist na convicted sa kasong cyber libel sa Pilipinas.

Sa mga lumabas na report kahapon, si Ressa ang unang mamamahayag na convicted na lumabag sa naturang batas.

Pero ayon kay DoJ Usec. at Spokesman Markk Perete, pang-apat lamang si Ressa sa mga guilty sa kasong cyber libel.

Ang unang guilty sa cyber libel ay journalist sa Albay na nasintensiyahan ng anim na buwan hanggang dalawang taon, apat na buwan hanggang isang araw na pagkakakulong.

Ang ikalawa at ikatlong convicted naman sa kasong cyber libel ay mula sa North Cotabato at mayroong parusang apat na taon hanggang walong taon na pagkakakulong.

Pinagmumulta rin ang dalawang journalist ng P1 million na halaga ng damages.

Kahapon nang hinatulang guilty ng Manila Regional Trial Court (RTC) Branch 46 si Ressa at dating Rappler researcher-writer Reynaldo Santos sa cyber libel charges na ibinaba ngayong araw lamang.

Ito ang naging desisyon ni Judge Rainelda Estacio-Montesa kay Ressa at Santos.

Nag-ugat ang kaso sa maanomalyang artikulo na isinulat ng Rappler noong 2012 at sinasabing muling inilathala online noong 2014 laban sa negosyanteng si Wilfredo Keng.

Inatasan din ng korte ang mga akusado na magbayad ng P200,000 na moral damages at karagdagang P200,000 bilang exemplary damages.

Ang mga akusado ay mayroong sintensiya ng pagkakakulong na anim na buwan at isang araw hanggang anim na taon.

Hindi naman agad makukulong si Ressa at Santos dahil puwede namang iapela ang kaso sa Supreme Court.

Entitled din si Ressa at Santos piyansa habang pinaplantsa nila ang legal remedies sa higher courts. (Daris Jose)