PBBM, nagpasaklolo na sa private banks sa pagtugon sa housing backlog

NAGPASAKLOLO na si Pangulong Ferdinand Marcos Jr. sa  private banks at hiniling na makipagtulungan sa government financial institutions sa paggawa ng sistema na magpopondo para sa housing program ng kanyang administrasyon.

Sinabi ng Office of the Press Secretary (OPS), tinuran ni Pangulong Marcos ang “indispensable support” ng private banking sector  sa idinaos na pulong sa Palasyo ng Malakanyang  kasama ang ibang opisyal kung saan tinalakay ang housing backlog ng bansa.

Ayon sa  OPS,  ang backlog ay tinatayang aabot sa  6.5 million units sa pagtatapos ng termino ni Pangulong Marcos sa 2028.

Nauna rito, sinabi ni Department of Human Settlements and Urban Development (DHSUD) Secretary Jose Acuzar, para matugunan ang bagay na ito, layon nila na magtayo ng isang milyong pabahay kada taon sa ilalim ng administrasyong Marcos na nangangailangan naman ng annual budget na ₱36 billion.

Upang maisakatuparan ang “ambitious program” ng Pangulo, sinabi ng OPS na nais ng Punong Ehekutibo na lumikha ng  financing system “to find the country’s cash flow that will support the endeavor.”

Ipinanukala rin ng Pangulo, ayon sa OPS  ang incentivizing private entities na makatutulong sa pagsisikap na ito.

“I think we can, there should be sufficient incentives… [an] arrangement for the private banks to come in,” ayon kay Pangulong Marcos.

Maliban kina Pangulong Marcos at  Acuzar, ang miting ay dinaluhan ng mga pinuno ng Bangko Sentral ng Pilipinas, Bureau of Treasury, Pag-IBIG, Government Service Insurance System, Philippine National Bank at Land Bank of the Philippines.

Idinagdag pa ng OPS na nagpahayag ng kani-kanilang pagsuporta ang mga kinatawan ng  BDO, Metrobank, Union Bank, Ayala Corporation, at China Bank sa housing program ng administrasyong Marcos, sabay sabing tutulong sila sa pag-develop ng financing system. (Daris Jose)