PBBM, pinangunahan ng inagurasyon ng SORSOGON SPORTS ARENA

PINANGUNAHAN ni Pangulong Ferdinand R. Marcos Jr., araw ng Huwebes ang inagurasyon ng Sorsogon Sports Arena (SSA) na itinaon sa ika-130 taong anibersaryo ng lalawigan at pagdiriwang ng ika-50 taong anibersaryo ng Kasanggayahan Festival.

Sinabi ni Pangulong Marcos na ang SSA, kayang maga-accommodate ng 12,000 katao at magsilbi bilang National Training Camp para sa mga atletang Filipino, ay isang malaking hakbang tungo sa dumaraming bilang ng mga Filipino Olympians.

Maliban sa magiging gamit ng SSA bilang sports training facility, sinabi ng Pangulo na ang SSA ay maaaring gamitin para sa mga komperensiya, summits, konsiyerto at kompetisyon.

“Bago ang lahat, nais ko munang batiin ang lahat ng mga Sorsoganon sa inyong ika-130 anibersaryo ng [pagkakatatag] ng inyong lalawigan at sa 50 Kasanggayahan Festival. Sa araw na ito, muli tayong nagsama-sama upang pasinayaan ang Sorsogon Sports Arena na ipinagmamalaki ng buong Bicol Region ngayon,” ang sinabi ng Pangulong Marcos sa kanyang naging talumpati.

“Sa pagtataya, kaya ng arena na ito na maiupo ang aabot sa 12,000 katao. [Maaari] rin itong gamitin bilang National Training Camp ng mga atletang Pilipino…Ito po ay isang mahalagang hakbang upang maitaguyod natin ang ating mga kababayan na may angking galing sa larangan ng palakasan. Sa tulong nito, mabibigyan sila ng pagkakataon upang mahasa pa ang kanilang mga talento.

Harinawa ay maidadagdag pa natin sila sa hanay ng ating Olympians at atletang Pilipino,” aniya pa rin.

“Bagama’t sports arena ang tawag natin dito, hindi lamang ito para sa mga larangan ng palakasan. Maaari din itong gamitin para sa mga pagpupulong o summits, konsierto, [at] mga patimpalak.”ang winika pa ng Pangulo.

Sa kabilang dako, kinilala naman ng Pangulo ang SSA bilang simbolo para sa mga Bicolanos at Sorsoganons para sa kanilang kasipagan at pagpupursige tungo sa pag-unlad.

“Kaya hindi natin maikakailang simbolo ng progreso ang Sorsogon Sports Arena. [Sumasalamin] ito sa patuloy na pagsisikap, pagtitiyaga, at pag-unlad ng mga Sorsoganon at mga Bikolano,” binigyang diin ni Pangulong Marcos.

At bago pa matapos ang kanyang talumpati, hinikayat ni Pangulong Marcos ang mga ito na ipagpatuloy lamang ang pagsuporta at pakikipagtulungan para sa kanyang hangarin na pag-unlad ng bansa.

“Kaya naman umaasa ako sa suporta ng mga Pilipino. Sa tulong ninyo, alam kong makakamit natin ang mga hangarin para sa ikauunlad ng bansa,” ang winika ni Pangulong Marcos. (Daris Jose)