PDu30, ipinagkibit-balikat lang ang pambabatikos ng “dating mahistrado” hinggil sa drug war

IPINAGKIBIT-BALIKAT lang  ni Pangulong Rodrigo Roa Duterte  ang mga pambabatikos at paninira ng isang “dating mahistrado”, at paglalarawan sa kanyang giyera laban sa  ilegal na droga bilang “clearly unconstitutional.”

Bagama’t hindi naman pinangalanan ni Pangulong Duterte  ang tinutukoy niyang “dating  mahistrado”,  matatandaan na kamakailan lamang ay kinumpara ni  retired Supreme Court (SC) senior justice Antonio Carpio  ang  nangyaring pagpatay sa mga drug suspects sa pagpatay sa mga langaw.

“If it’s unconstitutional, so be it. I will do it. I don’t give a sh*t if you have to know,” ayon kay Pangulong Duterte sa kanyang naging talumpati matapos inspeksyunin ang main campus ng  National Academy of Sports (NAS) sa New Clark City sa Capas, Tarlac.

Pinalagan naman ni Pangulong Duterte ang naging pahayag ni ‘dating mahistrado’ na hindi kaya ng gobyerno na maging malambot sa pagsisikap nitong walisin ang  illegal drug trade sa bansa.

“Mayroong isang torpe na ex-justice. Unconstitutional daw ‘yung drug war. E sabi ko ‘Adre, magkaiba ang libro natin’ You must have the wrong theories about humanities and all…Subukan mo dito sa trabaho ko,” ayon sa Chief Executive.

Aniya, maaaring maraming academic accomplishments si Mr. ex-justice  subalit wala namang ideya ito sa  drug war situation “on the ground” sa bansa.

“Para sa akin, bugok ka . You are a scholar. I know you’re from Davao, bright ka, valedictorian ka, okay ka. Pero hindi ‘yan pwede. In reality, you have to come to terms with what is actually happening on the ground,” dagdag na pahayag nito.

Ipinagtanggol naman ng Punong Ehekutibo ang kanyang drug war, iginiit na hindi niya inutusan ang law enforcement authorities  na ” kaagad na barilin at patayin ang mga drug suspects” maliban na lamang kung malalagay sa panganib ang kanilang buhay.

Muling inulit naman ng Pangulo na aakuin niya ang  “full legal responsibility” para sa kanyang  anti-narcotics campaign  hangga’t ang mga awtoridad ay umaakto na naaayon sa kanilang tungkulin.

“All you have to do, sabihin mo, ‘Sino nag-utos ‘sayo’? Sabihin mo si Duterte. Nobody can question my love of country,” ayon pa rin sa Pangulo.

Nilinaw din ni Pangulong Duterte na hindi niya inutusan ang mga pulis na saktan o patayin ang mga inosente.

“I never said go out and do a shooting spree and kill all the human beings…only those who will destroy my country. And in doing drugs, sisirain mo talaga,” anito.

Samantala, kinastigo naman ni Pangulong Duterte ang human rights groups para sa kanilang “concern” hinggil sa pagpatay sa mga drug suspects, halata naman aniya na hindi naman intersado ang mga ito pagdating sa mga pagbabanta sa buhay ng mga pulis,  military, at mga sibilyan.

“Have you ever considered the welfare of the country as against the criminals that I kill?” tanong ng Pangulo. (Daris Jose)