Presyo ng bilihin, pinangangambahanag tataas matapos ang bagyo

PINANGANGAMBAHANG tataas ang presyo ng bigas, gulay, manok, isda at iba pang produkto matapos tumama ang supertyphoon na si Egay (international name Doksuri) sa ,gaa sakahan at coastal areas partikular sa Central at Northern Luzon regions.

Ayon kay Kilusang Magbubukid ng Pilipinas secretary general Ronnie Manalo, mas lalong tataas ang presyo ng pagkain at mga bilihin dahil sa epekto ng superbagyo.

Base sa initial assessment ng Department of Agriculture Disaster Risk Reduction and Management Operations Center, nasa 2,009 ektarya ng palayan ang naapektuhan habang nasa 1,176 ektarya ng maisan ang nasira mataos bagyuhin ang Abra, Cagayan, Isabela, Ilocos Sur, Ilocos Norte, La Union, Pangasinan at iba pang bahagi ng Central at Southern Luzon provinces.

Inaasahan na tataas pa ang sira sa susunod na araw.

Sa ilang lugar sa Cagayan, binaha ang taniman ng palay at mais. Sinubukan naman ng mga magsasaka sa Pangasinan na anihin agad ang pananim bago ang takda sanang anihan.

Matinding tinamaan ng bagyo ang Ilocos region kung saan isinailalim na ito sa state of calamity dala na rin sa naapektuhang mahigit sa 21,000 katao. Sa Ilocos Sur, 14 munisipalidad ang wala pa ring kuryente at access sa manilins na tubig at mahigit sa 14,000 indibidwal ang nangangailangan ng agarang tulong.

Hinikayat naman ng grupo ang gobyerno na agad magpatupad ng price freeze sa mga nasalanta ng bagyo at magbigay tulong sa mga magsasaka at mangingisda at mga residenteng tinamaan ng bagyo.

Isang bagyo ang nakikitang namumuo, ayon sa PAGASA. Kapag pumasok ito sa Philippine Area of Responsibility, tatawagin ang naturang tropical storm na FalconPH. (Daris Jose)