Publiko, pinaalalahanan sa April 26 SIM registration deadline, gobyerno, telcos dapat magsagawa ng full-blast sa sign-up drive

SA NATITIRANG tatlong linggo para ipalista ang Subscriber Identity Module (SIM) numbers, nanawagan ang isang mambabatas sa mga kaukulang government agencies at public telecommunications entities (PTEs) na magpatupad ng full-blast sa kanilang registration drives pagkatapos ng Holy Week.

Ayon kay Camarines Sur Rep. LRay Villafuerte, ito ay upang mapaalalahanan ang mga users na iparehistro ang  tinatayang nasa 100 milyong mahigit na SIM cards bago umabot ang dealine ngayong Abril 26.

Dapat magtulungan aniya ang Department of Information and Communications Technology (DICT) at National Telecommunications Commission (NTC) kasama ang mga PTEs sa pagsasagawa ng full-blast sa kanilang nationwide registration drives.

“Otherwise, the government will have to extend the four-month deadline if it wants to record in the system as many numbers possible from the total SIM cards in the country whose owners have yet to register their SIMs,” dagdag ni Villafuerte.

Isa sa mga solusyon ay ang paglalagay ng mga karagdagang registration booths o assistance desks lalo na sa mga malalayong lugar.

Puwede rin aniyang manghingi ng tulong o suporta ang NTC at PTEs mula sa local government units (LGUs), particular na sa malalayong komunidad na may mahinang internet connection para sa paglalagay ng registration booths sa kani-kanilang lokalidad.

Naiulat sa NTC website na nitong nakalipas na weekend o tatlong linggo bago ang deadline,  nasa 57.19 million SIM cards ang nakapagparehistro sa tatlong PTEs, na tanging 34 % sa tinatayang 168.977 million SIMs sa buong bansa.

Nasa 28.97 million SIM card owners ang nakapagpalista sa Smart Communications Inc.; 23.83  million sa Globe Telecom Inc.; at 4.38 million naman sa DITO Telecommunity Corp. (Daris Jose)