Teves dadalo sa Senate probe ng Degamo slay

DADALO “virtually” si suspended Negros Oriental Rep. Arnolfo “Arnie Teves Jr. sa imbestigasyon ng Senado kaugnay sa pagpaslang kay Governor Roel Degamo, ayon kay Senator Ronald “Bato” dela Rosa.

Si Teves ang itinuturo ng Department of Justice (DOJ) na utak at financier sa pagpatay kay Gov. Degamo batay sa mga inisyal nilang nakalap na impormasyon at testimonya ng mga nadakip na suspek sa krimen.

Ayon kay Dela Rosa, nagpaabot ng commitment at kinumpirma ni Teves sa pamamagitan ng kanyang Secretary na haharap siya sa pagdinig ng komite ‘virtually’.

Sinabi ni Dela Rosa na napakahalagang makuha ng kanyang komite ang panig ni Teves.

Wala rin umanong problema sa kanya ang pakay ni Teves sa desisyon nitong dumalo sa pagdinig ng Senado at linisin ang kanyang pangalan.

Maaaring ihayag ni Teves ang anumang gusto nitong sabihin at siya bilang chairman ng komite ay naroroon naman para kontrolin ang magiging takbo ng pagdinig.

Tiniyak din ni Dela Rosa na hindi niya hahayaang magamit ni Teves sa ‘grandstanding’ ang committee hearing.

Giit pa ng Senador na hindi niya batid kung anong motibo ni Teves na mas pinili nitong makipag-cooperate sa Senado sa halip na sundin ang panawagan ni Speaker Martin Romualdez na umuwi na ng bansa.

Nilinaw naman niya na kung biglang hindi na dadalo sa pagdinig ?sa Abril 17 si Teves ay hindi naman ito maaaring mai-cite for contempt dahil may ‘interparliamentary courtesy’ na dapat sundin at kilalanin ng Kongreso. (Daris Jose)