VP Leni sa vaccine infomercial kasama si Duterte: ‘Open na open ako’

Iginiit ni Vice President Leni Robredo na handa siyang makipagtulungan kay Pangulong Rodrigo Duterte para mahikayat ang mas maraming Pilipino na tumanggap ng COVID-19 vaccines.

Pahayag ito ng pangalawang pangulo, matapos siyang akusahan ng tagapagsalita ni Duterte na tutol umano ito sa mga bakuna ng China.

“Open na open ako kung kailangan iyan para makatulong sa vaccine trust. Any time, Ka Ely. Sabihin lang sa akin kung anong gagawin ko, kailan, saan,” ani Robredo sa kanyang weekly radio program.

Nilinaw ng VP Leni na walang katotohanan ang paratang ni Presidential spokesperson Harry Roque.

Ayon sa bise presidente, iminungkahi lang niya na idaan sa tamang proseso ang Chinese vaccines dahil hindi naging malinaw ang panuntunan ng paggamit nito noong umpisa ng vaccine rollout.

Kung maaalala, hindi pa agad inirekomenda ng Food and Drug Administration ang Sinovac COVID-19 vaccine sa mga healthcare worker at senior citizen.

Umapela rin noon ang Health Professionals Alliance Against COVID-19 (HPAAC) na gawaran muna ng “positive recommendation” ng Health Technology Assessment Council ang naturang bakuna.

“So ang sinasabi ko, Ka Ely, sana naman bago naggagawa ng mga public statements iyong mga regulatory agencies natin, nag-uusap-usap muna kasi hindi siya nakakatulong. Hindi siya nakakatulong sa vaccine trust. Iyon iyong sinabi ko, Ka Ely, dahil kapag sinabing sinisiraan o kino-kontra ko iyong Sinovac dati, fake news po iyon.”

Bago pa man nagsimula ang pamahalaan sa pag-rolyo ng COVID-19 vaccines, naging aktibo na ang Office of the Vice President (OVP) sa paglalabas ng “infomercials” tungkol sa bakuna.

Noong nakaraang linggo nang matanggap ni Robredo ang kanyang unang dose ng AstraZeneca COVID-19 vaccine.

Hanggang sa ngayon ay wala naman daw siyang nararamdaman na seryosong side effect maliban sa pagka-ngalay ng braso at pakiramdam ng nilalagnat.

“Delayed sa akin, Ka Ely, medyo mangalay, tapos iyong pakiramdam ko na feverish ako. Alam mo iyon, Ka Ely, iyong pakiramdam mo magkakasakit ka. Pero noong kinuhaan ako ng temperature, wala naman akong sakit. Pero sandaling-sandali lang, sandaling-sandali lang, Ka Ely, after a few minutes wala na.” (Daris Jose)