2 wanted sa droga sa Navotas at Valenzuela, timbog sa manhunt ops

NALAMBAT ng pulisya ang dalawang lalaki na kapwa wanted sa kaso na may kinalaman sa illegal na droga sa magkahiwalay na manhunt operation sa Navotas at Valenzuela City.

Ayon kay Navotas police chief P/Col. Mario Cortes, dakong alas-10:00 ng gabi nang maaresto ng mga tauhan ng Warrant and Subpoena Section (WSS) ng Navotas police sa manhunt operation sa B. Cruz St., Brgy. Tangos ang 40-anyos na lalaking nasa top 10 most wanted person ng lungsod.

Pinosasan ng mga pulis ang akusado sa bisa ng warrant of arrest na inisyu ni Presiding Judge Ronaldo Q. Torrijos ng Regional Trial Court (RTC) Branch 288, Navotas City noong April 28, 2024, para sa paglabag sa Section 5 at 11, Article II of R.A. 9165.

Sa Valenzuela, natimbog naman ng mga tauhan ni P/Col. Nixon Cayaban, hepe ng Valenzuela police ang 34-anyos na lalaki na residente ng Bulacan at kabilang sa mga most wanted person ng lungsod sa ikinasang manhunt operation sa RTC Builiding sa  Maysan Road, Brgy. Malinta, ala-1:45 ng hapon.

Ani Col. Cayaban, binitbit ng mga tauhan ng Detective Management Unit ng Valenzuela police ang akusado sa bisa ng warrant of arrest na nisyu ni Presiding Judge Orven Kuan Ontalan ng RTC Branch 285, Valenzuela City noong May 10, 2024, para sa paglabag sa Sec. 12 at Sec. 15 Art. II of R.A 9165.

Pinapurihan naman ni Northern Police District Director P/BGen. Rizalito Gapas ang Navotas at Valenzuela CPS sa kanilang matagumpay na operation na nagresulta sa pagkakaaresto sa mga akusado. (Richard Mesa)