27K pasahero dumadagsa kada araw

UMAABOT sa 27,000 pasahero ang lumalapag sa bansa kada araw na karamihan ay mga balikbayan na nais makasama ang kanilang pamilya sa selebrasyon ng darating na Pasko, ayon sa Bureau of Immigration (BI).

Sinabi ni Carlos Capulong, acting chief ng BI-Port Operations Division, nasa pagitan ng 25,000 hanggang 27,000 ang kanilang naitatala na dumarating na pasahero sa lahat ng paliparan sa bansa nitong mga nakalipas na araw.

Napakalaki ng agwat nito kumpara sa 5,000 passenger arrivals na naitala nila nang umpisahang buksan ang borders ng Pilipinas sa mga dayuhang turista nitong Marso.

Samantala, inaasahan pa na lalong dadagsain ng dayuhang turista ang Pilipinas partikular na ang Boracay sa pagbubukas ngayong Dis­yembre ng international flights patungo sa Taiwan sa mga bagong Kalibo at Caticlan airports sa Aklan.

Sinabi ni BI Commissioner Norman Tansingco na nakaiskedyul na ikasa ang “inaugural flight” ng “new Caticlan airport” ngayong araw (Dec. 13) mula Caticlan patungo sa Taipei ng Royal Air.