Unang batch ng bakunang made in Russia, maaaring dumating sa Abril 12

INAASAHAN na ang pagdagsa ng mga bakuna laban sa Covid -19 sa bansa ngayong buwan.

Sinabi ni Chief Implementer at vaccine czar Secretary Carlito Galvez na maaaring sa darating na Lunes ay dumating na ang kauna- unahang batch ng bakuna na galing ng Russia.

Nauna na kasing sinabi ni Galvez na inaasahan ang pagdating pa ng mga bakuna ngayong 2nd quarter.

Aniya, ang bakuna ng Gamaleya ang inaasahan nilang paparating ngayong Abril 12 kasunod ng iba pang mga bakuna na paparating ngayong linggo ding ito gaya ng Sinovac.

“Sa tanong po na ano po ang mga darating na vaccines this coming April, darating po ang Sinovac na 1.5 million at saka mayroon po tayong Gamaleya na 500 or more or less two million doses.

So ngayong first … sa next week po baka dumating na po ang 500,000 ng Sinovac. So titingnan din po natin iyong Gamaleya, baka dumating na rin po this coming April 12,” ayon kay Galvez.

Sa buwan naman ng Mayo ani Galvez ay paparating na rin ang Moderna na galing ng Estados Unidos.

“So sa May deliveries po, magkakaroon po tayo ng two million sa Sinovac, sa Gamaleya and then darating na po and Moderna. So more or less, mga 4,194,000 po na doses ang matatanggap po natin,” aniya pa rin.

“Sa June po, magkakaroon po tayo ng more or less mga 10,500,000 doses kasama po ang Sinovac, Gamaleya and also Novavax at saka iyong delivery natin sa AstraZeneca. And July, baka po tumaas po tayo, na magkaroon po tayo ng more or less mga 13.5 million. And August delivery, 20,000 at hanggang maging ano po sa November,” dagdag na pahayag ni Galvez.

Kaya nga aniya tinatayang nasa 4 million,194,000 ang paparating na bakuna ngayong buwan hanggang sa susunod na buwan na bubuuin ng mga brand na Sinovac, Sputnik V at Moderna. (Daris Jose)