Vaccination sa PNP hindi mandatory – PNP Chief

Hindi mandatory at hindi sapilitan ang pagbabakuna sa Philippine National Police (PNP).

Ito ang paglilinaw ni PNP Chief Gen. Guillermo Elezar ngayong nagsimula na ang vaccination sa A4 category.

Sinabi ni PNP Chief kanilang uunahin ang mga pulis na nagpahayag ng kagustuhan na magpabakuna.

Pero batay sa kanilang survey nasa mahigit 92 percent na sa mga pulis ang nais magpa bakuna.

Dagdag pa ni Eleazar na hindi naman nila paparusahan o bibigyan ng sanction ang mga pulis na ayaw talaga magpabakuna.

Kaya ang kanilang ginawa ay mismo siya bilang pinuno ng pambansang pulisya ay nanguna sa vaccination program ng pamahalaan, nang sa gayon mahikayat ang mga pulis na magpabakuna.

Ang 500 doses na bakuna ay pauna lamang ito sa kabuuang 28,000 doses na allocation ng PNP na ibinigay ng Department of Health (DOH) para sa buong National Capital Region (NCR).

Sinabi ni Eleazar na wala pang vaccine allocation para sa mga regional police offices kaya hinikayat nito ang mga police personnel na kung maaari ay i-avail na nila ang vaccination program ng mga LGUs para sila ay mabakunahan na rin.

Hindi pa masabi ni Eleazar kung kailan ibibigay sa kanila ang nasa 27,500 na Covid-19 vaccine.

Siniguro naman ni Chief PNP na nakahanda naman sila anumang oras at araw para simulan ang vaccination sa kanilang hanay.

Ayon kay PNP Health Service Director BGen. Luisito Magnaye sa 500 doses na bakuna na ibinigay sa kanila 200 doses dito ay nakalaan para sa national headquarters, 200 sa National Capital Region Police Office (NCRPO), 50 sa PNP SAF at 50 para sa iba pa. (Gene Adsuara)