2 seniors, 7 pa, kalaboso sa P694K shabu sa Malabon

KULUNGAN ang kinabagsakan ng siyam na bagong identified drug personalities, kabilang ang 63-anyos na lola at 61-anyos na lolo matapos makuhanan ng halos P.7 milyon halaga ng shabu sa magkahiwalay na buy bust operation ng pulisya sa Malabon City.

Ayon kay Malabon police chief Col. Albert Barot, alas-2:40 ng madaling araw isagawa ng mga operatiba ng Station Drug Enforcement Unit (SDEU) sa ilalim ng pangangasiwa ni PLT Alexander Dela Cruz ang buy bust operation sa Womens Club St., Brgy. Hulong Duhat matapos ang natanggap na impormasyon mula sa kanilang impormante hinggil sa pagbebenta umano ng shabu ni Lynne Matin-ao alyas “Maya”, 21 ng Navotas City.

Nang tanggapin ng suspek ang P3,500 marked money mula sa police poseur-buyer kapalit ng isang plastic schet ng shabu ay agad siyang inaresto ng mga operatiba, kasama sina Coney Soria, 46 at Raymond Gaspar, 28, na kapwa nakuhanan ng tig-isang plastic sachets ng hinihinalang shabu.

Ani PMsg Randy Billedo, tumitimbang ng humigi’t kumulang sa 65.20 grams ng hinihinalang shabu na may standard drug price P443,360.00 ang nakumpiska sa mga suspek at buy bust money.

Nauna rito, alas-11:30 ng gabi nang matimbog din ng mga operatiba ng SDEU sa buy bust operation sa Lapu- Lapu Avenue corner Dalagang Bukid St., Brgy. Longos sina Lorena Estavillo alyas “Daisy”, 63, Arjay Ungui alyas “RJ”, 28, Reynaldo Castillo, 41, Albert Desabille, 39, at Zaldy Manio, 61.

Sinabi ni PSSg Jerry Basungit , tinatayang nasa 29 grams ng hinihinalang shabu na may Standard Drug Price Php197, 200.00 ang narekober sa mga suspek, kasama ang P500 marked money.

Nasa 8 grams naman ng hinihinalang shabu na nasa P54,400.00 ang halaga at P500 buy bust money ang nasamsam ng mga operatiba kay Pol Bryan De Jesus, 35, matapos madakma sa buy bust operation sa Rizal Ave. Extention Brgy.Tañong alas-2 ng madaling araw.

Nahaharap ang mga naarestong suspek sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)