Akusasyon ni VP Robredo, pinalagan ng Malakanyang

PINALAGAN ng Malakanyang ang akusasyon ni Vice President Leni Robredo na walang malinaw na direksyon ang  administrasyon para tugunan ang COVID-19 crisis.

“I beg to disagree, seriously disagree with the Vice President,” ayon kay Presidential Spokesperson Harry Roque.

Tila ipinamukha ng Malakanyang kay Robredo ang mga hakbang ng gobyerno  na nagresulta ng mababang mortality rate para sa  COVID-19 (1.55%) at napabuti ang kapasidad ng mga ospital  para gamutin ang mga pasyente na  may severe at critical cases.

“Hindi po totoo na  hindi sapat ang ating response. Siguro madali pong magpula dahil hindi tayo ang nasa gitna ng pandemya at hindi tayo ang inaasahang gumalaw,” diing pahayag ni Sec. Roque.

Nauna rito, sa 20-minute speech ni Robredo, araw ng Lunes ay hayagang binatikos nito ang ginagawa ng pamahalaan sa pagtugon sa COVID-19.

Kaagad namang binuweltahan ni Pangulong Rodrigo Roa Duterte ang panibagong pasaring ni  Robredo sa ginagawang pagtugon ng pamahalaan sa coronavirus disease 2019 o COVID-19 pandemic.

Giit ng Pangulo sa kanyang public address, nagdaragdag lamang ng “fuel to the fire” si Robredo.

Binigyang diin ng Chief Executive na ang pagsira sa pamahalaan o maging ang kanyang kamatayan ay hindi aniya solusyon sa problema ng bansa.

“Ang pakiusap lang ni Presidente, magkaisa po sa panahon ng pandemya; isantabi muna ang pulitika. Matagal-tagal pa po iyan, marami pang mangyayari mula ngayon hanggang 2022 [elections]. Tulungan muna natin ang ating taumbayan,” ayon kay Sec. Roque. (Bishop Jesus “Jemba” M. Basco)