Alab sa ABL: 10th season ng liga, isuspinde na

HINILING ni Alab Pilipinas team owner Charlie Dy sa pamunuan ng ASEAN Basketball League na suspindihin ang ongoing 10th season ng liga kasunod mg naging deklarasyon ng World Health Organization (WHO) na isa ng pandemic ang novel coronavirus (COVID-19).

Bukod sa Alab, humiling na rin ang mga koponan ng Hong Kong Eastern, Macau Black Bears at Formosa Dreamers na umaksiyon na ang liga hinggil sa lumalaganap na krisis.

“Since the ABL is a regional league and travel will be difficult and risky, we deem it appropriate to request the ABL to follow the NBA and other sporting leagues in suspending our season,” pahayag ni Dy.

Sa kasalukuyang standings ay pumapangalawa ang Alab, taglay ang 10-6 na marka kung saan huli silang naglaro noong Pebrero 23.

Nasa ika-6 na puwesto naman ang Macau na may patas na markang 7-7 at huli silang naglaro noong Enero 29.
Pumapang-apat naman ang Formosa na may 8-6 na kartada at huli silang naglaro noong Pebrero 2 habang pang-siyam naman ang Hong Kong(3-7) na huli ring naglaro noong Pebrero 2.

Ang mga sumunod nilang mga laro ay na postponed na dahil sa COVID-19.

Kamakailan lamang ay ipina-quarantine si Singapore import Jameel McKay matapos mapag-alaman na sumakay ito ng eroplano na may lulang pasahero na nagpositibo sa virus.

Umaasa si Dy na pakikinggan sila ng ABL sa kanilang hiling para sa kapakanan na rin ng mga players at ng mga fans.
“Alab Pilipinas believes that our fans and supporters will understand this move as it is for the best interest of everyone to take precaution,” ayon pa kay Dy. “Many experts have shared that social distancing is the best way to mitigate the spread of COVID-19 and we wish to take part of this solution.”