Andrea, in-unfollow na ang Instagram account ni Derek

HABANG isinusulat namin ang kolum namin ay wala pang sagot sina Derek Ramsay at Andrea Torres na pareho naming pinadalhan ng private message.

Nalungkot kami kung totoo ngang break na sila.

Pero, malaki rin naman ang posibilidad na baka may tampuhan lang. At kung pagbabasehan ang galawan ng kanilang social media accounts, lalo na ang Instagram, madaling isipin na si Andrea ang may tampo dahil si Andrea ang hindi na naka-follow sa Instagram account ni Derek. Nag-delete or nag-hide rin ito ng mga pictures nilang dalawa.

Habang si Derek ay nag-like pa sa IG post ni Andrea three days ago lang.

Binasa namin ang mga comments sa latest post ni Derek sa IG, grabe na naman ang nga comments na ibinabato sa actor. Wala pa namang kumpirmasyon kung ano na nga ang estado ng relasyon nila, matitinding akusasyon at panlalait na ang binabato rito.

Kabaligtaran naman sa mga nagko-comment kay Andrea. Karamihan din ng comments, nanghihinayang sa AnDrek Vlog at sa bahay na ipinatayo ni Derek kung totoong wala na nga raw ang dalawa.

*****

MAGKA-AWAY man ang mga karakter nina Kapuso Primetime King Dingdong Dantes at Neil Ryan Sese sa award-winning series na Descendants of the Sun magkasundo naman ang dalawa sa tunay na buhay lalo na pagdating sa pagnenegosyo.

“Rivals on TV, but tag team (and proud) delivery boys in real life.”

Iyan ang pahayag ni Dingdong o ‘Big Boss’ sa kanyang Instagram post. Nag-deliver sila ng seafood na ibinebenta ni Neil sa pamamagitan ng delivery app na DingDong PH.

“Happy to have delivered fresh seafood from K&G Seafood with Neil Sese today. Ingat tayong lahat sa kalsada sa paparating na bagyo. #YouRingItWeBringIt,” dagdag pa ng Kapuso actor.

Nitong Setyembre ay opisyal nang umarangkada ang delivery business ni Dingdong kung saan katuwang niya ang grupo ng mga displaced worker ng film at TV industry na nagsisilbing mga delivery rider. (ROSE GARCIA)