Balik-trabaho na after almost four years: MARIAN, in-announce na malapit nang mag-taping sa sitcom nila ni DINGDONG

AFTER almost four years, ready na muling bumalik sa trabaho si Kapuso Primetime Queen Marian Rivera. 

Nauna rito iyong hindi muna siya tumanggap ng work after giving birth to their second child ni Kapuso Primetime King Dingdong Dantes, si Jose Sixto IV.

At nang pwede na sana siyang mag-work, saka naman natin naranasan ang pandemic at kung may offer man sa kanya, hindi niya matanggap dahil kailangang mag-lock in taping at hindi  niya kayang iwanan si Zia na naka-online class at si Sixto naman ay bini-breast feed pa niya.

Hindi naman nawawalan ng mga endorsements si Marian, at sunud-sunod pa rin ang mga offers sa kanya.  Work from home din siya sa pagpapatuloy niyang mag-tape ng mga spiels ng Saturday drama anthology na siya ang host, ang Tadhana.

Masaya nga silang mag-anak kapag may taping siya dahil sa bahay nila ginagawa at si Dingdong ang nagdidirek, at kasama pa nila si Zia na minsan ay nagiging clapper girl at si Sixto naman ay natutuwang tinuturuan siya ng ama kung paano tumingin sa kamera.

Last Monday, February 28, nagkaroon na ng face-to-face contract signing si Marian as the first and only face of Kamiseta Skin Clinic ni Ms. Cris Roque, since nasa Alert Level 1 na ang National Capital Region.

Doon, nag-announce na si Marian na may comedy show silang gagawin ni Dingdong sa GMA Network.

    “Any moment ay magsisimula na kaming mag-taping,” kuwento ni Marian.

“Tapos na ang script, finalizing na lamang ang bubuo sa cast, magkakaroon na kami ng script reading, then tuloy na sa taping.”

Nilinaw din ni Marian na hindi totoong magtatambal sila ni new Kapuso actor John Lloyd Cruz sa isang teleserye sa GMA, tulad nang unang nasulat.

(NORA V. CALDERON)