DOH tutol sa mandatory booster

HINDI KUMBINSIDO  ang Department of Health (DOH) sa panukala ni Presidential Adviser for Entrepreneurship Joey Concepcion na gawing mandatory ang COVID-19 booster shots sa ngayon dahil may iba pang mga paraan upang ikampanya ang vaccination drive sa bansa,

Una nang iginiit ni Concepcion na gawing mandatory sa mga establisimento sa mga lugar na nasa ilalim ng Alert Level 1 o sa mga lugar na natapos na ang primary series ng pagbabakuna laban sa COVID-19.

Sa isang public briefing, sinabi ni Health Undersecretary at National Vaccination Operations Center head Myrna Cabotaje na hindi pa sila maaring sumang-ayon kay Concepcion.

“We understand where he is coming from – he wants full protection.But for now, what we can do is give out information and request the people to get their boosters,” aniya.

“Ang gagawin natin ay i-strengthen natin ang advocacy . . . [Ang government agencies] at partners natin sa private sectors ay pag-iibayuhin ’yung communication and advocacy to increase the uptake of booster,”dagdag pa nito.

Aminado naman si Cabotaje na mababa pa ang bilang ng mga nagpa-booster sa mga nakalipas na linggo dahil hindi pa nakikita ng mga tao ang pangangailangan na maturukan na nito.

Nasa 36 milyon na ang nakatakda sa booster shots subalit nasa 10.5 milyon pa lang ang nakatanggap nito hanggang nitong Marso 5.

Sa datos, may 63.7 mil­yong indibiduwal na ang nakakumpleto na ng bakuna na 70% ng target na 90 milyong populasyon.

Upang palakasin, nakatakdang isagawa ng gobyerno ang ikaapat na yugto ng National Vaccination Day mula Marso 10 hanggang 12 kung saan ang mga COVID-19 jab kung saan tututok sa mga residential at sa workplaces.