DOJ, nakikipag-ugnayan sa pag-uwi ni Veloso

NAKIKIPAG-UGNAYAN na ang Department of Justice (DOJ) sa Department of Foreign Affairs (DFA) para malaman ang proseso sa pagpapauwi sa Pilipinas sa Filipina OFW na si Mary Jane Veloso na nasa death row matapos maibaba ang kanyang hatol sa life sentence sa pamamagitan ng ilang beses na apela ng gobyerno ng Pilipinas .

Sinabi ni Justice Sec. Jesus Crispin Remulla na nakahanda na ang DOJ sa pagbabalaik bansa ni Veloso.

Aniya inatasan ang National Bureau of Investigation (NBI) na sumundo kay Veloso sa paliparan kung saan sasailalim muna sa medical check-up bago ideretso ito sa Women’s Correctional.

Sinabi pa ng kalihim na sa ngayon, walang hinihingin kapalit ang bansang Indonesia sa pagpapa-uwi kay Veloso at ang DFA na ang bahalang makipag-usap sa Indonesia.

Kaugnay nito, nagpaabot ng pasasalamat ang DOJ sa walang patid na apela ng administrasyong Marcos para mailigtas ang kababayan na si Veloso na nasa death row dahil sa kasong drug trafficking.

Naaresto si Veloso, humigit-kumulang 14 na taon na ang nakalilipas at unang hinatulan ng kamatayan ng firing squad noong Abril 2015.

Matapos ang serye ng mga diplomatikong diyalogo at mas matibay na ugnayan sa ating mga internasyonal na kasosyo, lalo na sa Indonesia, nagawa ng gobyerno ng Pilipinas na ipagpaliban ang pagpataw ng hatol na kamatayan nang sapat upang makamit ang isang mas mahabaging desisyon na pabor sa ating kababayan.

Naninindigan ang DOJ na kaisa ng PBBM sa muling pagpapakita sa mundo na walang maiiwan sa ilalim ng administrasyong Bagong Pilipinas, kung saan ang bawat buhay ay pinangangalagaan at iginagalang anuman ang katayuan, na pinatunayan sa inaasahang paglaya ng ating kababayan na si Mary Jane Veloso na may basbas ng pamahalaan ng Indonesia. GENE ADSUARA