DTI nagbigay ng cash aides sa Valenzuela MSEs

SA pamamagitan ng Department of Trade and Industry’s (DTI) Pangkabuhayan sa Pagbangon at Ginhawa (PPG) katuwang ang Pamahalaang Lungsod ng Valenzuela sa pamamagitan ng Local Economic Development and Investment Promotions Office (LEDIPO), ay mabibigyan ang Micro and Small Enterprises (MSEs) ng P10,000 bilang paunang puhunan para matulungan lumago ang kanilang maliit na negosyo.

Nangako si DTI Secretary Ramon Lopez na magbibigay ng cash assistance na hindi bababa sa 1,000 sa maliliit na business owners mula sa Valenzuela na magsisilbing pondo para ipagpatuloy ang pagpapatakbo ng kanilang sariling negosyo.

Sinabi ni NCR Regional Director Marcelina S. Alcantara na pangunahing layunin ng nasabing programa ay suportahan ang mga taong naapektuhan  ng sakuna, lalo na ang mga napilitang isara ang mga negosyo dahil sa banta ng COVID-19 pandemic.

“Ang atin lamang pong objective dito sa Pangkabuyan sa Pagbangon at Ginhawa (PPG) ay matulungan ‘yung atin pong mga Micro-Enterprises na galing po sa priority natin, kumbaga ay eligible beneficiaries. Gaya ng nasunugan at na-pandemic,” ani Director Alcantara.

Sa kanyang mga natitirang araw sa opisina bilang chief executive, nagbigay ng ilang payo si Mayor REX Gatchalian sa kanyang mga nasasakupan na nabigyan ng cash assistance. Tiniyak niya na ang pera ay magagamit ng matalino at epektibo para ang PPG program ay patuloy na sumusuporta sa kanilang mga negosyo.

“Hindi lang ito ayuda kundi dagdag kapital mula sa Dapartment of Trade and Industry (DTI) para matulungan kayong makabuwelo pa lalo. Alam nating marami po sa mga negosyante nating maliliit ay talagang lubhang naapektuhan ng pandemya dahil nagamit po kung saan-saan ang kanilang kapital,” pahayag ni Mayor REX. (Richard Mesa)