Garapal na online sellers ng face mask, alcohol tutugisin ng DTI

TINIYAK ng Department of Trade and Industry (DTI) na hahabulin nila ang mga garapal at hindi lehitimong online sellers na nagbebenta ng face mask, alcohol, sanitizers at iba pa sa gitna ng coronavirus disease (COVID-19).

Sa Laging Handa press briefing sa New Executive Building (NEB), Malakanyang ay sinabi DTI Secretary Ramon Lopez na hindi sertipikado ang mga online sellers.

Dagdag pa ni Lopez, posibleng peke ang kanilang mga tinda kaya wala din itong bisa o hindi epektibong panlaban sa COVID-19.

Kaugnay nito ay sinabi ni Lopez na nagsimula na rin silang magpunta sa mga warehouse ng mga manufacturers ng face mask at iba pang sanitary products para mag-inspeksyon.

Kapag naman napatunayan na sila ay nagtatago ng kanilang produkto lalo na ngayong nasa state of public health emergency ang bansa ay maaari silang mapanagot sa batas, babala pa ng Trade secretary.

Sinabi nito na hahabulin din aniya nila ang mga hoarders at profiteers.

Samantala, umaapela ang gobyerno sa publiko na wag mag-panic buying dahil hindi kasama sa gagawing paghihigpit na pumasok sa Metro Manila ang mga cargoes kaya tuloy-tuloy ang supply.

Ang panic buying aniya ang dahilan kung bakit nagkakaroon ngayon ng artificial shortage.

Hindi rin uubra sa gobyerno ang kasabihang “The customer is always right.”

Sinabi ni Lopez na hindi aplikable sa ngayon na gamiting panangga ng mga consumer ang naturang kasabihan lalo na’t nag-isyu na sila ng direktiba sa mga supermarket na limitahan ang pagbili ng alcohol sa dalawang bote lamang.

Aniya, simple lang naman ang dapat gawin kung hindi susunod ang isang consumer sa paglilimita sa pagbebenta ng alcohol ay tawagin ang guwardiya at palabasin ng establisyemento ang pasaway na consumer na nakakadagdag lang sa mga dahilan para magkaruon ng artificial shortage.

Binigyang diin ng Kalihim na walang kakapusan ng alcohol at hindi mauubos ang alcohol sa Pilipinas. (Bishop Jesus “Jemba” M. Basco)