Ginang na wanted sa pagtay sa asawa, timbog sa Valenzuela police

LAGLAG sa selda ang 39-anyos na ginang na nasa likod umano ng pagpatay sa kanyang asawang Pakistani nang matunton ng pulisya sa ikinasang manhunt operation sa Valenzuela City.

Sa kanyang ulat kay NPD OIC Director P/Col. Josefino Ligan, kinilala ni Valenzuela City Police Chief P/Col. Nixon Cayaban ang naarestong akusado na si alyas “Jenna”, residente ng South Balintawak sa Quezon City.

Ayon kay Col. Cayaban, nasa Top 4 Most Wanted Female Fugitive ng Police Regional Office (PRO) 3 ang akusado kaya nang makatanggap sila ng impormasyon na madalas siyang mamataang nagtutungo sa Brgy. Maysan, agad ikinasa nila ang operasyon ng mga operatiba ng Valenzuela Police Intelligence Section (SIS).

Alas-2:50 ng hapon nang maaresto ang akusado ng mga operatiba ng SIS sa Maysan Road, Brgy. Maysan, katuwang ang mga tauhan ng Dinalupihan Police Municipal Station, Bataan Provincial Police Office, MDIT-RIU-NCRPO, Northern MARPSTA sa bisa ng warrant of arrest na inilabas noong Pebrero 13, 2024 ni Dinalupihan, Bataan Regional Trial Court (RTC) Presiding Judge Ma. Lourdes Eltanal Ignacio ng Branch 5 para sa kasong murder na walang inirekomendang piyansa.

“This is a significant step in ensuring justice for the victim and his family. The apprehension of Jenna demonstrates our relentless pursuit of wanted criminals, regardless of the time that has passed or where they attempt to hide. The joint forces involved in this operation are to be commended for their dedication and coordination,” pahayag ni P/Col. Cayaban.

Nagsimula umanong magtago hanggang sa manirahan sa naturang ang akusado matapos matuklasan ng pulisya na sangkot siya sa pagpatay sa kanyang negosyanteng asawa na isang Pakistani national.

Sa record ng pulisya, pinagbabaril ang dayuhan ng dalawang lalaking sakay ng isang motorsiklo na nagpanggap na customer sa loob mismo ng kanyang resort sa Brgy. Payumo, Dinalupihan, Bataan noong nakaraang taon sa lalawigan ng Bataan.

Nakatakas ang mga suspek subalit, sa pagsisiyasat ng pulisya ay natuklasan na ang mismong kanyang asawa na Pinay na si alyas Jenna ang nasa likod ng pamamaslang. (Richard Mesa)