Gobyerno, patuloy na kakalingain ang mga lubos na nangangailangan-PBBM

PATULOY na kakalingain ng gobyerno  ang mga kababayan na lubos na nangangailangan.

“Hindi po natin sila pababayaan,” ang pahayag ni Pangulong Ferdinand Marcos Jr. sa kanyang unang State of the Nation Address (SONA) sa Batasang Pambansa Complex sa Quezon City, araw ng Lunes, Hulyo 25.

Mangunguna  aniya sa pag-aagapay sa  mga ito ang Department of Social Welfare and Development (DSWD).

Kaya ang utos  niya sa DSWD ay ang mabilis na pagtugon sa pangangailangan ng mga biktima ng kalamidad at mga iba’t ibang krisis.

Ang mga field office  aniya ng DSWD ay ay inatasan na maagang maglagak ng family food packs at non-food essentials sa mga LGU, bago pa man manalasa ang anumang kalamidad.

Sinabi pa ng Pangulo na magdadagdag din ang pamahalaan ng  mga operations center, warehouse at imbakan ng relief goods, lalo na sa mga malalayong lugar na mahirap marating.

Titiyakin din aniya ng gobyerno  na maayos ang koordinasyon ng DSWD at Department of Human Settlements and Urban Development ng sa ganun, madali ang pagpapatupad ng Emergency Shelter Assistance program para sa mga biktima ng kahit anong kalamidad.

Pagtitibayin din aniya niya ang komprehensibong programang ‘Assistance to Individuals in Crisis Situations’ o ang  tinatawag na AICS, para maiparating ang tulong sa mas maraming biktima.

Siniguro naman ng Pangulo na hindi niya pahihirapan ang mga biktima ng krisis na dudulog sa ahensiya — “gagawin nating simple ang proseso ng paghingi at pagpaparating ng tulong.   Dahil hindi naman dapat dinadagdagan pa ang hirap  na nararanasan ng ating mga mamamayan. ”

“Upang matiyak na mapupunta sa kwalipikadong mga pamilya ang tulong ng pamahalaan sa pamamagitan ng 4Ps o Pantawid Pamilyang Pilipino Program, titiyakin natin na malilinis ang listahan ng benipisyaryo,” ani Pangulong Marcos.

Samantala, ibinalita naman nito na higit na sa isang milyong pangalan na ang naka-graduate na sa listahan.

“At nagagalak akong mabatid na sila ay nakakatayo na sa kanilang sariling paa,” ayon kay Pangulong Marcos.

Kaugnay nito ay inutusan aniya niya ng DSWD na pag-ibayuhin pa ang pag-repaso ng listahan upang maitutok ang pamimigay ng sapat na ayuda sa mga lubos na nangangailangang pamilya.

Bukod dito, magpapatuloy din aniya ang supplemental feeding program para sa mga bata sa Child Development Centers at Supervised Neighborhood Play, at lalo pa aniya niyang  palalawakin  ito sa taong 2023.

Hindi rin aniya niya  nakakalimutan ang mga solo parents  at mga nanay na nahiwalay sa kanilang mga mister dahil sa karahasan.

“Pagtitibayin natin ang programa sa Violence Against Women and Their Children, kabilang na ang counselling para sa mga biktima, katuwang ang ating mga LGU,” ayon sa Pangulo.

“Tiyakin natin na sapat ang pondo sa halos pitumpong residential care centers at pitong non-residential care centers para sa vulnerable sectors at persons with disabilities na sumisilong dito,” dagdag na pahayag nito. (Daris Jose)