Gobyernong Duterte, determinado na pigilan na mawala ang isa pang teritoryo sa WPS

DETERMINADO ang pamahalaan na pigilan ang pagkawala ng isa pang teritoryo matapos palayasin ng mga coast guard authorities ang Chinese vessels mula sa Sabina Shoal sa West Philippine Sea.

Pinuri ni Presidential Spokesperson Harry Roque ang pinakahuling hakbang ng coast guard, sabay sabing ang bansa ngayon ay nagpapalayas ng mga foreign vessels mula sa local waters sa halip na tayo ang pinapalayas.

“Yan po ang administrasyon ni Presidente Rodrigo Roa Duterte sa administrasyon ni Albert del Rosario nung siya ay DFA (Department of Foreign Affairs) tayo ang pinapalayas, pero kay Presidente Duterte tayo ang nagpapalayas,” ayon kay Sec. Roque.

“Malinaw po nasa loob yan ng ating exclusive economic zone at napalakalapit sa Palawan. Walang kaduda-duda tayo lang may karapatan sa area na ‘yun,” dagdag na pahayag nito.

Pinanindigan naman ni Sec. Roque na nananatiling committed ang pamahalaan na protektahan ang ‘sovereignty at sovereign rights’ sa West Philippine Sea.

“Ang pinandigan po ng Presidente wala pong teritoryong mawawala sa administrasyon niya at ‘yan po ang kanyang pinatutupad ngayon,” anito.

“Lahat po ng teritoryo dapat pangalagaan at tama po na ang coast guard ang magbantay niyan dahil kabahagi po yan ng ating tanging yaman,” dagdag na pahayag ni Sec. Roque.

Sa ulat, tila nag-iba ang takbo ng joint maritime exercise ng Philippine Coast Guard (PCG) at Bureau of Fisheries and Aquatic Resources (BFAR) sa Sabina Shoal noong nakaraang linggo nang paalisin nito sa teritoryo ng Pilipinas ang 7 barko na kalauna’y nalamang galing China.

Ayon kay Philippine Coast Guard spokesperson Commodore Armando Balilo, nasa lugar ang barkong BRP Cabra at dalawa pang barko ng BFAR nang mamataan ang una’y 7 unidentified foreign vessel bandang alas-9 ng umaga ng Abril 27.

Nasa halos 120 kilometro ang Sabina Shoal mula sa Mapankal Point ng Rizal, Palawan.

Nakaangkla roon ang mga barko na nadiskubreng mga China maritime militia vessel.

Agad niradyuhan ng Coast Guard sa mga barko para igiit na nasa Philippine Exclusive Economic Zone ang mga ito at pinagpapakilala sila.

Kasama sa mga hiningi ang pangalan ng mga barko, bakit naroon sila at kung saan sila nanggaling at patungo.

Sabi ng PCG, 3 beses hindi sinagot ang pagraradyo nila kaya nilapitan na ng 3 barko ng Pilipinas ang mga Chinese militia vessel. Doon nag-angat ng angkla at nagpaandar ng makina ang mga ito.

Matatandaang noong Marso nagparada ang Tsina ng 200 barko sa Julian Felipe or Whitsun Reef.

Noong Abril, may naganap ding parehong paghahamon ng barko ng Chinese military sa sasakyan ng mga Pilipinong mangingisda na kasama ng ABS-CBN news team na patungong Ayungin Shoal.

Nitong linggo naman, humingi ng paumanhin si Foreign Affairs Sec. Teodoro Locsin Jr. dahil sa pagmumura sa tweet na gumigiiit na umalis na ang Tsina sa mga isla ng Pilipinas sa West Philippine Sea.

Nanawagan naman si Duterte sa Tsina noong Lunes na hayaan nitong makapangisda nang mapayapa roon ang mga Pilipino, at idinagdag na nananatiling ‘benefactor’ ang Tsina sa Pilipinas.

Samantala, may sagot naman si Sec. Roque kay retired Supreme Court senior Associate Justice Antonio Caprio na sinabing “grand estafa” ang sinabi ni Duterte na hindi sya nangakong ibabalik ang mga teritoryo ng Pilipinas na inangkin ng Tsina. (Daris Jose)