JOHN LLOYD, nag-trending dahil inabangan ang first tv appearance; ganun na lang ang pasasalamat kay WILLIE

INABANGAN at nag-trending nga sa Twitter Philippines ang first appearance ni John Lloyd Cruz sa Shopee 6.6 tv special last Sunday, na ginanap sa Smart Araneta Coliseum at napanood sa GMA-7.

Si Willie Revillame ang host/producer ng show at dahilan sa pagbabalik ni John Lloyd sa Kapuso Network.

Binigyan ni Willie ng bonggang introduction at exposure si John Lloyd na umaming nanginginig at naninibago sa muling paglabas niya sa telebisyon makalipas ng maraming taon.

Mas naging sentimental nang kantahin ni John Lloyd ang “Yakap,” na pinasikat noong 1979 ng Spanish singer na si Junior, na bumagay ang lyrics sa kanyang pagbabalik-telebisyon.

Mainit ang pagsalubong ni Willie kay John Lloyd at ganun na lang ang pasasalamat niya sa host ng Wowowin.

“This is the first time for more than four years.

“Welcome back on TV! Ngayon ka lang nakita.

“Nakikita ka sa social media pero siyempre, iba ang telebisyon.

“Buong mundo, pinapanood ka.

“Lloydie, ano ang nararamdaman mo?” ang sabi ni Willie kay John Lloyd.

“Nagpapasalamat sa’yo, nandito ako,” sagot ni JL.

“Excited to be back! Kuya Willie, nandito ako dahil sa’yo, thank you, thank you!”

Halatang naging emotional si John Lloyd pero pinigilan niya na mapaluha habang nagsasalita si Willie.

“Pinagdaanan ko din ‘yan,” kuwento ni Willie.

“Maraming tao ang tumulong sa akin pero ang importante, Lloydie, nakausap kita. Nagkausap tayong dalawa, napakaganda ng puso mo, napakaganda ng pagkatao mo.

“Mahal na mahal mo si Elias, mahal na mahal mo iyong anak mo. Nami-miss ka naming lahat.

“Ang galing mo! Fan mo ako, fan mo kaming lahat dahil napakabuti mong tao at napakagaling mong artista!”

Dagdag pa niya, “Sa totoo lang, lahat ng GMA artists, gusto kang makasama sa isang pelikula.

“Lloydie, iyong sumuporta sa’yo na sambayanang Pilipino, I think sila ang dapat mong pasalamatan kaya ka nandito. Nadidinig ko, nararamdaman ko ang pagmamahal sa’yo ng tao.

“Welcome back sa industriya kung saan ka nagsimula at alam ko dito tayo magtatapos din.

“Welcome back, John Lloyd Cruz!!!”

Pinakita rin sa nasa audience sina Maja Salvador at ang fiancé and business partner na Rambo Nunez para sa suportahan ang newest talent ng Crown Artist Management at tinatawag ni John Lloyd kanyang new manager na si “Ms. M”.

Hindi naman nakalimutan ni Willie na banggitin ang plano nila ni John Lloyd na magsama sa isang programa ng GMA-7 na tulad ng mga nasulat na, isa itong sitcom at posibleng makasama nila si Andrea Torres, kung walang magiging aberya sa negosasyon.

“Abangan n’yo ho, abangan n’yo, magsasama kami ni Lloydie sa pagbibigay ng saya sa inyo, sa primetime show.

“Abangan n’yo dito sa GMA-7!”

(ROHN ROMULO)