Lumalalang health care utilization sa labas ng NCR plus

HANGGANG ngayon ay wala pa namang nakikita ang Malakanyang na konklusyong apektado na rin ang health care utilization sa labas ng NCR plus.

Sinabi ni Presidential Spokesperson Harry Roque, patuloy ang ginagawa nilang pagbabantay nila sa mga datos at wala pa naman sa gayung estado ang iba pang rehiyon ng bansa.

Ang paglobo ay nasa NCR Plus kaya’t ang response concentration nila sa kasalukuyan ay nasa mga area na nasa ilalim ng Metro Manila plus.

“Sa ngayon po binabantayan naman natin ang datos at wala pa naman pong ganoong conclusion ang nakikita natin ‘no. Ang talagang paglobo po ng mga kaso ay nandito sa NCR Plus at kaya nga po ang response natin dito muna sa NCR Plus. Pero as I said po, binabantayan din natin ang mga kaso sa iba’t ibang lugar ng Pilipinas. Pero so far po, nothing as bad as what we are seen in NCR Plus,” ayon kay Sec. Roque.

Para naman kay DILG Undersecretary Bernie Florece ay inihayag nitong sa siyensa nakabase ang anumang magiging konklusyon at base na din sa available data.

Kaya maaga pa aniyang sabihing may posibilidad na magkaroon ng expansion ng strict quarantine mula NCR Plus at maging Luzon-wide ito.

“Mayroon tayong pinagbabatayan, ito ay nakabase sa siyensya na base ito sa available data ‘no. Mayroon tayong mga experts na nag-aral nito at sila ang nagri-recommend sa IATF. Ngayon pagdating sa IATF ay ito naman ay pinagdidebatehan, hindi naman iyong porke gusto natin na ilagay ito sa isang classification ay gagawin na natin ‘no. Ito ay pinag-aaralang mabuti ‘no. So ito ay nakabase sa siyensya at sa mga datos,” ayon kay Florece. (Daris Jose)