Modified coding binalik ng MMDA

Muling pinatupad ng Metropolitan Manila Development Authority (MMDA) ang number coding o ang tinatawag na Volume Reduction Program (UVVRP) sa rush hours na magsisimula ng 5:00 hanggang 8:00 ng gabi.

Ang mga Metro Manila mayors na siyang mga miyembro ng Metro Manila Council (MC) ay nagkaisang aprobahan ang isang resolusyon na magbabalik ng pagpapatupad ng UVVRP ng walang pagbabago.

“Under modified number coding, the MMDA will prohibit motor vehicles from plying the throughfares from 5:00 to 8:00 in the evening,” wika ni MMDA Chairman Benhur Abalos.

Ang nasabing UVVRP ay ipapatupad lamang sa weekdays maliban kung holidays at ang kasama lamang dito ay ang mga pribadong mga sasakyan.

Hindi kasama ang mga public utility vehicles, transportation network vehicle services (TNVS), motorcycles, garbage trucks, fuel trucks at mga sasakyang nagdadala ng mga kailangan at nabubulok na mga kalakal.

Dahil ang mga PUVs ay hindi pa pinapayagan na magkaron ng 100 percent capacity, nirekomenda ng MMDA na hindi muna sila isama sa number coding scheme.

“Stickers shall be issued to TNVS as they could not be easily identified while traversing the streets and we are in coordination with the TNVS on the implementation of rules and regulations regarding this concern,” dagdag ni Abalos.

Kasama rin sa ban ang mga trucks upang mas maging maluwag ang trapiko sa National Capital Region.

Ipatutupad din muli ang uniform light truck ban na may modification. Ang light trucks ay ang mga sasakyan na pang commercial na gamit o kahit hindi man na may gross capacity na 4,500 kilograms o mas mababa pa dito at may anim (6) o higit pa na gulong at may payload area na maaaring bukas o sarado man.

Depende sa UVVRP motor vehicle plate endings, ang mga light trucks ay pinagbabawalan na dumaan sa EDSA sa pagitan ng Magallanes at Makati City at North Avenue, Quezon City sa parehas na northbound at southbound mula sa 5:00 hanggang 9:00 mula Lunes hanggan Biyernes maliban kung holidays.

Ayon sa MMDA, lumalabas sa kanilang datus na may 403,000 na sasakyan na ngayon ang mga nasa lansangan ng Metro Manila kumpara sa 405,00 na sasakyan noong nakaraang January 2020 at kahit pa bago ang pandemya.

“More vehicles are traversing EDSA everyday. We are not yet in December but the way it is going the traffic situation is approaching pre-pandemic levels,” saad ni MMDA Traffic Engineering Center chief Neomie Recio.

Kung mas dadami pa ang volume ng sasakyan katulad ng bago pa ang pandemya, mapipilitan ang MMDA na ipatupad ang number coding scheme ng buong araw.  Subalit sa ngayon, ang pagsisikip ng trapiko ay nangyayari sa peak hours tuwing gabi lamang.  LASACMAR