NTF, pupunta ng Basilan, iba pang BARMM areas para bilisan ang vax drive — adviser

PUPUNTA ang National Task Force (NTF) Against COVID-19 sa Bangsamoro Autonomous Region in Muslim Mindanao (BARMM) para taasan ang COVID-19 vaccination drive sa rehiyon.

Sa Laging Handa briefing, sinabi ni NTF medical adviser Dr. Ted Herbosa na inanunsyo ni NTF Chief Implementer at vaccine czar Secretary Carlito Galvez Jr. na nakatakda silang bumisita sa BARMM para alamin kung bakit mabagal pa rin ang progreso ng pagbabakuna sa nasabing lugar at hikayatin ang mga residente na magpabakuna.

“Marami-rami na rin ang ating mga lalawigan na umabot sa 70% vaccination rate of their target, ‘yun ang good news. Of course, may mga lugar na mababa pa. Siyempre, titignan natin at aaanalisa kung pano natin mapapabilis pa at mabibigyan ng bakuna ang ating mamamayan doon,” ayon kay Herbosa.

Habang maraming lugar ang naabot na ang 70% vaccinated population, sinabi ni Herbosa na pag-aaralan pa rin nila kung paano pabibilisin ang inoculation drive sa mga lugar na mayroong mababang vaccination rate, partikular na sa Mindanao region.

Sa kabilang dako, sinabi ni Interior Secretary Eduardo Año na ang BARMM ang may “pinakamababang” vaccination rate sa lahat ng rehiyon sa bansa kaya’t dito magpo-pokus ang pamahalaan sa panahon ng extension ng third wave ng mass vaccination drive nito.

Ang Bayanihan, Bakunahan III, ay orihinal na itinakda mula Pebrero 10 hanggang 11, ay na-extend ng hanggang Pebrero 18.

Ani Herbosa, isa sa problemang kanyang nakikita kung bakit mabagal ang pagbabakuna sa Mindanao region ay dahil ang komunidad doon ay may duda kung ang bakuna ay “halal or lawful.”

“Nag-announce na ang national commission ng Muslim affairs na aprubado naman ‘to at hindi haram ang ating mga bakuna at wala namang galing sa mga animals. Most of the vaccines we got come from plant products, so hindi siya totoo na haram siya,” paliwanag ni Año.

“Ang sabi ng ating mga Muslim leaders, basta for public good, ‘yan ay halal,” dagdag ng Kalihim.

Upang hikayatin ang Muslim community na magpabakuna, sinabi ni Herbosa na ang communication and information campaign ng pamahalaan ay kailangan na paigtingin sa BARMM gaya ng ginawa sa National Capital Region (NCR).

Isa pang balakid aniya ay ang mga vaccination sites sa mga lugar ay hindi “accessible” sa publiko hindi kagaya sa Kalakhang Maynila.

“Gagawan natin ng solusyon ‘yan. Magkakaron ng paraan para mapalapit natin lalo ‘yung mga vaccination centers. ‘Yung ibang probinsya nga, naggawa na ng tinatawag na barangay by barangay na ang kanilang pagbabakuna para dalhin ang bakuna talaga malapit sa ating mga kababayan,” aniya pa rin. (Daris Jose)