Pagbabawas ng physical distance ng mga commuters muling pag-uusapan ng IATF

MULING pag-uusapan ng Inter-Agency Task Force (IATF) ang isyu patungkol sa ipatutupad na sanang pagbabawas ng social distancing sa mga pampublikong sasakyan.

Bumuhos kasi ang pagpalag at pagtuligsa  ng iba’t  ibang sektor sa nasabing hakbang dahil na rin sa pangambang baka lalo pang kumalat ang virus.

Giit ni Sec. Roque, marunong naman silang makinig sa mga hinaing kaya’t bukas na bukas din ay tatalakayin nila sa IATF meeting ang isyu.

Araw ng Huwebes ayon kay Sec. Roque nang aprubahan  ng Task Force ang panukalang  itaas ang ridership sa mga pampublikong sasakyan sa pamamagitan ng pagbabawas ng physical distance sa mga commuters.

Mula sa isang metro, ay magiging 0.75 meters o dalawang talampakan at limang pulgada na ang distansya ng bawat pasahero sa mga tren simula Lunes, September 14 sa LRT line 1, LRT line 2, MRT line 3, at PNR.

Samantala, todo-depensa naman ang Department of Transportation (DOTr) sa pagpapatupad ngayong araw ng reduced physical distancing sa mga public transport sa gitna ng hindi pa humuhupang COVID-19 pandemic.

Sinabi ni  DOTr Undersecretary Artemio Tuazon, nakabase sa siyensiya ang kanilang naging hakbang.

Ani Tuazon na ang pinagbasehan nila ay ang pag-aaral ng ibang eksperto, katulad ng International Union of Railways, kung saan lumalabas na hindi naman kailangan talagang ganun kalaki ang distansya para makaiwas sa virus.

Sa kanilang pag-aaral sinabi ng DOTr official na maaari pa rin bumaba ang transmission rate nang 94-95% kahit medyo dumikit ng konti ang mga pasahero basta’t sinusunod ang mga health protocols tulad ng pagsusuot ng face mask at face shield at ang regular disinfection.

Aniya pa, kung titignan ang mga datos ngayon, ang Pilipinas na lang ang nagpapatupad ng one-meter distancing sa mga railways sa buong mundo. (Daris Jose)