Pasahe sa barko, gawing abot-kaya

KASALUKUYANG naghahanap ng paraan ang  Department of Transportation (DOTr) para mabigyan ang mga pasaherong sumasakay ng barko ng “affordable price” para sa kanilang pasahe.

Sa Laging Handa public briefing,  tinuran  ni  DOTr Secretary Jaime Bautista na base na rin ito sa naging kautusan mismo ni Pangulong Ferdinand Marcos na gawing abot kaya ang pamasahe sa barko at siguraduhing kumportable at ligtas ang biyahe ng mga pasahero.

Sa kabilang dako, sinabi ni Bautista na nagbigay na siya ng direktiba para pag-aralan ng mga nangangasiwa sa pantalan ang charges na sinisingil ng mga kumpanya ng barko.

Ito’y sa harap  ng posibilidad na baka uubrang magtapyas ng pasahe ang mga kumpanya ng barko sa halip na magpataw pa ng pagtaas alinsunod na rin sa gusto sanang mangyari ng Chief Executive.

Giit pa ng Kalihim,  handa silang tumalima sa nasabing  kautusan ni Pangulong Marcos at gagawin aniya nila ang lahat ng posibleng kaparaanan para maibigay ang mas mababang singil sa pasahe ng mga sumasakay ng barko. (Daris Jose)