• June 14, 2024
  • Ang Diyaryong Pinagkakatiwalaan

PBBM, pinangalanan ang mga rice smugglers; nangako na hahabulin ang mga rice price manipulators

UPANG ipakita ang kanyang malakas  na  “political will” na tapusin ang rice smuggling sa Pilipinas, isiniwalat ni Pangulong Ferdinand R. Marcos Jr., araw ng Miyerkules, ang mga pangalan ng mga  rice smugglers  na sumisira sa takbo ng ‘rice supply and demand’ sa merkado.

 

 

Sa naging talumpati ng Pangulo sa isinagawang distribusyon ng bigas sa Taguig City, sinabi ng Pangulo na naghain na ng smuggling charges  ang gobyerno laban sa San Pedro Warehouse and Blue Sakura AgriGrains Corporation, FS. Ostia Rice Mill at  Gold Rush Rice Mill.

 

 

Ang mga  rice smugglers ayon sa Pangulo ay sinampahan ng paglabag sa  Customs Modernization and Tariff Act, Rice Tariffication Law, at Anti-Agricultural Smuggling Act of 2016 (Republic Act No. 10845).

 

 

“Kaya po ay ngayon ay kinasuhan na natin ang San Pedro Warehouse and Blue Sakura Agri Grain Corporation, ang F.S. Ostia Rice Mill, [at] ang Gold Rush Rice Mill ay kasalukuyang haharap sa patong-patong na mga kaso dahil sa kanilang mga ginagawa,” ayon sa Pangulo.

 

 

“Bagong Pilipinas na po tayo ngayon, at atin pong susugpuin ang mga hindi po lumalaban nang patas. Wala pong puwang sa lipunan ang mga nanlalamang at nang-aapi sa kapwa,”  aniya pa rin.

 

 

Ang pahayag na ito ng  Pangulo ay binanggit niya sa pamamahagi ng bigas sa Taguig City University Gymnasium, General Santos Avenue, Lower Bicutan sa Taguig City  kung saan tiniyak niya sa mga mamamayang filipino na desidido ang gobyerno sa hakbang nito na tiyakin ang food security sa bansa.

 

 

Sa kabilang dako, ang ipinamahaging bigas sa mga residente ng Taguig ay bahagi ng smuggled rice na nasabat sa isang operasyon ng  Bureau of Customs (BOC) sa Zamboanga City.

 

 

Binigyang diin ng Punong Ehekutibo na nais niyang magpaabot ng  “strong warning” laban sa mga  rice smugglers na ang administrasyon ay hindi lamang uupo at walang gagawin para tuldukan ang kanilang ilegal na gawain na labis na nakasasakit hindi lamang  sa ekonomiya kundi maging sa mga mamamayang Filipino.

 

 

“Una, upang mamahagi ng bigas para sa ating mga benepisyaryo. Pangalawa, upang bigyang-diin ang ating  pagsisikap sa pagsulong ng seguridad ng pagkain sa bansa. At ang panghuli ay upang iparating sa inyo na seryoso ang pamahalaan sa pagsugpo sa smuggling, sa hoarding, at iba pang ilegal na gawaing nakaaapekto sa supply at presyo ng bilihin sa merkado,” ayon kay Pangulong Marcos.

 

 

“Binabalaan ko ang mga sumasabotahe sa ating ekonomiya: Kayong mga smuggler, kayong mga hoarder, at sindikato, tigilan na ninyo ang mga masama ninyong gawain,” aniya pa rin.

 

 

Samantala, sinabi naman ni Pangulong  Marcos na ang rice smugglers ay kakasuhan ng paglabag sa  Republic Act No. 10845 at Republic Act No. 7581 (Price Act).  (Daris Jose)

Other News
  • Ads February 17, 2020

  • 200 tauhan ng LTO-NCR West ipapakalat ngayong Semana Santa

    NASA  200 na mga kasapi ng Land Tranportation Office sa National Capital Region-West ang ipinakalat nila para sa pagpapatupad ng “Oplan Biyaheng Ayos: Oplan Semana Santa at Summer Vacation 2023”.     Ayon kay LTO-NCR West Regional Director Roque Verzosa III na layon ito ay para matiyak na nasusunod ng mga pampasaherong sasakyan ang Land […]

  • Priority pa rin ang pamilya kesa sa pag-aartista: ELLEN, wish pa rin na magka-baby girl para tapos na ang ‘boxing’

    FIVE years old na si Elias Cruz ngayon, ang anak nina Ellen Adarna at John Lloyd Cruz, kaya gusto na raw ng aktres na magkaroon sila ng anak ni Derek Ramsay.   Sa grand opening ng Shinagawa Diagnostic and Preventive Care Center kahapon sa Ore Central Building, BGC, inamin ni Ellen na wish pa rin […]