Plano ni Sec. Roque sa politika, nakasalalay sa population protection

KAILANGAN na makamit muna ng bansa ang population protection bago pa magdesisyon si Presidential Spokesperson Harry Roque kung ano talaga ang kanyang plano sa pulitika.

Nakasama kasi ang pangalan ni Sec. Roque sa senatorial lineup ng ruling party para sa 2022 national elections na isinasapinal na ngayon ni Pangulong Rodrigo Roa Duterte.

“So, diyan muna po tayo tututok. So, siguro po kapag nakamit na natin iyong tinatawag na population protection, iyon po ang panahon para magdesisyon kung ano po ang magiging plano natin sa politika pero sa ngayon po, nakatutok po tayo sa ating katungkulan,” ani Sec. Roque.

Aniya, bumalik siya bilang Spokesperson sa panahon ng pandemiya dahil naniniwala siya na kinakailangan ang “factual at accurate” na mga impormasyon para makuha ng taumbayan sa panahon ng pandemiya.

“So, nakatutok po tayo diyan kasama din po sa ating ginagawa ang pagdalo sa lahat ng mga symbolic vaccinations na isang paraan na mapataas pa ang kumpiyansa sa pagbabakuna dahil gaya ng sinabi ni Dr. Solante, epekibo po ang lahat ng bakuna na ibinibigay natin sa ating mga kababayan laban sa lahat ng variants,” aniya pa rin.

Samantala, nagpasalamat naman si Sec. Roque kay PDP-Laban vice president for Visayas at Eastern Samar Governor Ben Evardone sa kumpiyansang ibinigay sa kanya nito at ng partido.

Sa ulat, isinasapinal na ni Pangulong Duterte ang senatorial lineup ng ruling party para sa 2022 national elections.

“President Rodrigo Roa Duterte is now finalizing his senatorial line-up composed of reelectionist, returning senators, cabinet members, and prominent personalities,” ayon kay PDP-Laban vice president for Visayas at Eastern Samar Governor Ben Evardone.

Ayon kay Evardone, kasama sa inisyal na listahan sina Public Works and Highways Secretary Mark Villar, Chief Presidential Legal Counsel Salvador Panelo, Presidential Spokesperson Harry Roque, Transportation Secretary Arthur Tugade, Labor Secretary Silvestre Bello III,  at Cabinet Secretary Karlo Nograles.

Kabilang din sina House Deputy Speaker Loren Legarda, Information and Communications chief Gregorio Honasan II, Senate Majority Floor Leader Juan Miguel Zubiri, dating senador JV Ejercito, Metropolitan Manila Development Authority chairman Benhur Abalos, Presidential Anti-Corruption Commission Greco Belgica, at Presidential Communications Operations Office Secretary Martin Andanar.

Ang mga personalidad na gaya naman nina Willie Revillame at Robin Padilla at broadcaster na si Raffy Tulfo ay kasama rin sa listahan ng posibleng senatorial candidates.

Sinabi ni Evardone na nais ni Pangulong Duterte na personal na ikampanya ang mga posibleng kandidato ng PDP-Laban.

“The track record in public service, integrity, competence, and their unselfish commitment to serve the poor and the less fortunate are among the considerations in selecting these individuals,” ayon kay Evardone.

At sa tanong naman kung kailan ang target date sa pagsasapinal ng lineup, sinabi ni Evardone na nagsasagawa pa ng konsultasyon si Pangulong Duterte lalo pa’t maraming aspirante ang nais na makasama sa ie-endorso ng Pangulo.

“PRRD’s endorsement power is very potent because of his enormous popularity,” ani Evardone. (Daris Jose)