Wala si Vice Ganda kaya iniintriga ng mga netizens: SHARON, pinangunahan ang star-studded ‘2022 ABS-CBN Christmas Station ID’

INILABAS na nga ang 2022 Christmas Station ID ng Kapamilya network na after two days may higit 1.5 views na kanilang Youtube channel.

“Tayo Ang Ligaya Ng Isa’t Isa” ang title ng Christmas song na isinulat ng creative director ng ABS-CBN Music na si Jonathan Manalo.

Napapanood na nga ang lyric video ng kanta na kung saan makikita ang star-studded cast.

Pambungad sa 2022 Christmas Station ID ng ABS-CBN ang ‘Darna’ stars na sina Jane de Leon, Joshua Garcia at Janella Salvador.

Kasunod nito ay isa-isa nang naglabasan ang mga naglalakihang Kapamilya stars na pinangunahan nina Megastar Sharon Cuneta at Piolo Pascual.

Umeksena sa first part ang mga sikat na loveteams ng ABS-CBN na KathNiel (Kathryn Bernardo at Daniel Padilla), DonBelle (Donny Pangilinan at Belle Mariano), FranSeth (Seth Fedelin at Francine Diaz), at KDLes (KD Estrada at Alexa Ilacad).

Sumunod na nakikanta sina Ogie Alcasid, Anne Curtis at Kim Chiu para sa ‘It’s Showtime’, Sinamahan ni Regine Velasquez, ang mga co-hosts niya na ‘Magandang Buhay’ na sina Jolina Magdangal at Melai Cantiveros,

Next naman ang pagbirit ng world-class singers na sina Zsa Zsa Padilla, Sarah Geronimo, Martin Nievera at Gary Valenciano. Kasama rin sina Jed Madela, Klarisse de Guzman, Morissette Amon, Angeline Quinto, Erik Santos, KZ Tandingan, Moira dela Torre at Chito Miranda.

Hindi naman nagpahuli sa pagbirit si Darren Espanto, kasama rin sina Ella Nympha, Andrea Brillantes, Kyle Echarri, AC Bonifacio, Khimo Gumatay, Anji Salvacion at Bailey May.

Sa bandang huli rin lumabas si Piolo, na pinakasikat na Kapamilya aktor. At tama lang naman kay Sharon ibigay ang last spot or end frame ng CSID dahil deserved na deserved niya yun bilang Megastar.

Pero ‘di nga pinalampas ng mga netizens at kapansin-pansin talaga na wala si Phenomenal Box-Office Star Vice Ganda.

Naiintriga tuloy sila kung ano ang nangyari at hindi nakaabot si Vice sa taping ng Kapamilya CSID na posibleng hindi napayagang umalis sa shooting ng MMFF 2022 entry nila ni Ivana Alawi, na kailangan na ngang tapusin.

Wala pang opisyal na pahayag si Vice Ganda sa kanyang social media accounts, kaya abangers na ang mga netizens sa kanyang pasabog na post.

For sure, hindi lang naman si Vice ang hindi nakaabot, marami pang iba ang naka-miss ng taping at malay natin, meron pang ibang version na lumabas.

Ang going back sa taunang ABS-CBN Christmas Station ID, marami ang natuwa lalo na ang solid Kapamilya at tumindig ang balahibo sa mensahe ng awitin. May mga Muslim pa ngang nag-comment na super love at nag-enjoy sila sa video.

Maraming nagpapasalamat sa ABS-CBN dahil ramdam na ramdam nila ang Paskong Pinoy at isa ito kukumpleto sa kanilang pagdiriwang.

At pasok na pasok nga ang titulo ng awitin na, ‘tayo ang ligaya ng isa’t-isa’, maging kapamilya, kapuso at kapatid, saan panig ka man ng mundo sa pagsapit ng Pasko.

(ROHN ROMULO)