PDu30, hindi naging pabaya sa pag-iimbestiga sa drug war killings

Ang pagpapalabas ng impormasyon ng  52 kaso ng police anti-drug operations na nagresulta sa pagpatay sa mga  drug suspects  ay nagpapakita lamang na hindi naging pabaya si Pangulong Rodrigo Roa  Duterte sa kanyang obligasyon  na imbestigahan ang human rights violations sa panahon ng kanyang termino.

Ang pahayag na ito ni Presidential Spokesperson Harry Roque ay matapos ipalabas ng  Department of Justice (DOJ) ang  “an information table” na nagpapakita ng detalye ng  52 insidente gaya pangalan ng nga napatay na suspects at lugar at petsa ng kanilang pagkamatay.

“I can only commend the DOJ for this conclusion because this proves that the President has not been remiss in his obligation to investigate perpetrators of these crimes,” ayon kay Sec. Roque sa isang panayam sa Kapihan sa Manila Bay news forum.

Aniya, ang impormasyon ng  52 insidente ay nagpakita na ginagampanan ng estado ang obligasyon nito na protektahan at i-promote ang  karapatang mabuhay sa pamamagitan ng pagbibigay sa mga biktima ng epektibong
domestic remedy sa pamamagitan ng paghahain ng kaso upang matiyak na ang mga “guilty” ay mauusig.

“I think these findings of the DOJ will belie all claims that the President is responsible under the principle of command responsibility because on the contrary, it proves that the Philippine state has in fact investigated and prosecuted individuals for these extralegal killings,” dagdag na pahayag ni Sec. Roque.

Binanggit pa rin ni Sec. Roque na si Pangulong Duterte ay  “discharged of his obligation as chief implementer of the law” dahil siya ang naging dahilan ng pagsasampa ng kaso sa mga sangkot.

Kumpiyansa rin si Sec. Roque na malilinis ng Pangulo ang kanyang pangalan  sa oras na bumaba na siya  mula sa kapangyarihan.

“I don’t think it says anything about the culpability of the President because in the 52 cases there’s not been an instance where there’s been a determination that the President ordered the killing or that the President did not do anything to punish those who committed criminal acts,” dagdag na pahayag nito. (Daris Jose)