ISANG hinihinalang tulak ng iligal na droga ang arestado matapos makuhanan ng tinatayang nasa P4.7 milyon halaga ng shabu sa ikinasang buy-bust operation sa Navotas city, kamakalawa ng gabi.

Kinilala ni Navotas police chief Col. Dexter Ollaging ang naarestong suspek na si Saipoden Guinal, alyas “Saipo”, 31 ng RM 16 4th FLR, New Barter Trade., Brgy. 383 Quiapo, Manila.

Sa report ni Col. Ollaging kay Northern Police District (NPD) Director PBGEN Jose Hidalgo Jr, alas-8:07 ng gabi nang magsagawa ang mga operatiba ng Station Drug Enforcement Unit (SDEU) sa pangunguna ni PLT Genere Sanchez, kasama ang Station Intelligence Section sa pangunguna ni PLT Luis Rufo ng buy-bust operation kontra sa suspek sa kahabaan ng C4 Road., Brgy. BBN.

Nagawang makipagtransaksyon sa suspek ng P39,000 halaga ng droga ng isang undercover police na nagpanggap na buyer.

Matapos tanggapin ni Guinal ang markadong salapi mula sa poseur-buyer kapalit ng shabu ay agad lumapit ang back up na operatiba saka sinunggaban ang suspek.

Nasamsam sa suspek ang tinatayang nasa 700 gramo ng hinihinalang shabu na may standard drug price na P4,760,000 at buy bust money na binubuo ng 4 na tunay na P1000 bills at 35 pirasong P1000 boodle money.

Kasong paglabag sa RA 9165 o ang Comprehensive Dangerous Drug Act of 2002 ang isinampa ng pulisya kontra sa suspek sa Navotas City Prosecutors Office. (Richard Mesa)