NALUNGKOT ang mga fans ng Pambansang Ginoo na si David Licauco, nang aminin niya sa interview ng Kapuso Showbiz News, na nakakaranas siya ng sleep apnea, at kailangan niyang magpagamot sa isang specialist.  

Ngayon pa naman namamayagpag ang career ni David sa pagganap niya bilang si Fidel, katambal si Barbie Forteza as Klay, kaya nabuo ang kanilang FiLay loveteam.

Healthy looking si David, pero serious pala ang sleeping disorder niya.

“It’s scary talaga, it’s been my insecurity since it started when I was 16 years old, so it’s been 11 years na yung sleep apnea ko, na my breathing stops, about 30 seconds straight about 24 times in an hour when I’m sleeping.

“Ilan sa symptoms nito ay ang pagiging irritable, daytime drowsiness, at fatigue dahil sa interruptions ko sa pagtulog.  Kaya humihingi ako ng tawad sa mga taong nasungitan ko dahil sa effect ng condition ko.

“Sa gabi lamang umaayos ang mood ko, kaya pupunta muli kami ng mom ko sa doctor ko for a check up again.  Baka I need an operation soon, kasi nahihirapan na ako.”

Tamang-tama naman na natapos na ang taping ng buong cast ng historical fantasy series na ‘Maria Clara at Ibarra’ nasa last two weeks na lamang mapapanood sa GMA-7 every 8 pm.

Don’t miss kung ano ang magiging ending ng FiLay love team.  Masunod kaya ang gusto ng mga fans nila na sa pagtatapos ng serye ay sasama si Fidel kay Klay sa pagbalik nito sa bagong panahon?

***

PUMAYAG si Kapuso actress Carla Abellana na sumailalim sa legit lie detector test ni Bea Alonzo para sa personal vlog nito.

Sinagot namang lahat ni Carla ang mga tanong ni Bea at pasado naman ang mga sagot niya sa machine, like may nagpaparamdam na ba sa kanyang manligaw ulit, meron daw  nagpaparamdam pero wala namang nanliligaw.

Wala siyang regret na nagpakasal siya, pero hindi pa raw siya ready na ma-in love ulit at muling mag-asawa.  Hindi na niya babalikan si Tom Rodriguez, no more second chance.  Pero napaisip si Carla sa tanong if he will work again with Tom.

Ayaw na raw niya, pero paano raw kung gusto ng GMA na muli silang pagtambalin?

May Valentine’s Day date ba siya sa February 14?

“Wala, may Baguio trip lamang kami ng mga barkada ko, na mga friends ko na sila since elementary pa lamang kami noon.  Tiyak na mag-ienjoy kami sa Baguio.”

Kasalukuyang ginagawa ngayon ni Carla ang balik-tambalan serye nila ni Gabby Concepcion na “Stolen Life” sa GMA Network, na makakasama nila si Beauty Gonzalez.

Una silang nagtambal ni Gabby sa “Because of You” in 2017.  Malapit na ring mapanood si Carla sa “Voltes V: Legacy” sa second quarter of 2023.

***

MARAMI nang naghihintay sa world premiere ng action adventure series na “Mga Lihim ni Urduja” na magpapabalik sa Jewels of Primetime na sina Kylie Padilla, Gabbi Garcia at Sanya Lopez, na una silang nagsama-sama noon sa “Encantadia.”

Makakasama rin nila sa serye sina Michelle Dee, Arra San Agustin, Vin Abrenica, Pancho Magno, Kristoffer Martin, Rochelle Pangilinan, Jeric Gonzales at Zoren Legaspi.

Sa story, Kylie and Gabbi will work in a special law enforcement operation entrusted with the recovery of precious, pre-colonial jewelry ng legendary and mythical Queen Urduja (Sanya Lopez) of the 1300s.      Ang “Mga Lihim ni Urduja” ang papalit sa magwawakas nang “Maria Clara at Ibarra.”

(NORA V. CALDERON)

SIMULA sa Lunes, Pebrero 13, magbabalik na ang Hari ng Primetime na si Coco Martin para bigyang-buhay ang isa na namang dekalibreng obra ni Fernando Poe Jr. na “FPJ’s Batang Quiapo.”

Pagkatapos ng makasaysayang seven-year run bilang Cardo Dalisay sa “FPJ’s Ang Probinsyano,” muling sasabak si Coco sa mga makapigil-hiningang bakbakan bilang ang matapang at astig na tagapagtanggol ng bayan na si Tanggol/Baldo sa “Batang Quiapo.”

Isang star-studded cast ang makakasama ni Coco sa serye, kabilang na ang anak ni FPJ na si Supreme Actress Lovi Poe. Ito rin ang kauna-unahang FPJ title kung saan gaganap si Lovi.

Sa isang teaser na inilabas ng ABS-CBN, ibinahagi ni Coco kung gaano ka-importante para sa kanya na gumawa ulit ng panibagong kwento ni FPJ na hindi lamang siksik sa action scenes, kundi puno rin ng mahalagang aral na kapupulutan ng mga manonood.

Ang “Batang Quiapo” ang magsisilbing unang sabak ni Coco bilang aktor, co-director, at co-producer sa ilalim ng CCM Film Productions kung saan ipapakita ng serye ang kagandahan ng lugar at iba’t ibang mga kwentong Pilipino mula sa Quiapo.

“Napaka-rich ng kultura niya, lahat ng mga buhay o kwento ng bawat taong nasa Quiapo. Napakalawak ng kwento at isa pa ito sa mga pelikulang talagang tumatak sa mga ginawa ni FPJ at ni Ms. Maricel Soriano,” pahayag ni Coco.

Mapapanood sa action-comedy series si Coco bilang si Tanggol/Baldo, isang pasaway ngunit mapagmahal na anak sa kanyang nanay (Cherry Pie Picache), tatay (John Estrada), lola (Charo Santos), at nakababatang kapatid (McCoy de Leon).

Gagampanan naman ni Lovi si Mokang, ang magandang kaibigan ni Tanggol na magpapakilig bilang kanyang “partner in crime.”

Pagbibidahan din ito nina Benzon Dalina, Mark Lapid, Ronwaldo Martin, Jojit Lorenzo, Ping Medina, Mercedes Cabral, Alan Paule, Lou Veloso, Susan Africa, Pen Medina, Lito Lapid, Irma Adlawan, at Christopher de Leon, kasama ang co-director ni Coco na si Malu Sevilla.

Samantala sa grand mediacon, muling inamin ni Coco kung bakit niya nasabing mahirap siyang katrabaho.

Ayon sa hinahangaan at matulunging aktor, “kasi hindi pwede sa akin yun puwede na.

“Ina-assure ko na dapat quality na ibibigay natin sa manonood. Yung tiwala at oras na nilalaan nila dapat sinusuklian natin yun. Dahil sila ang dahilan kung bakit tayo may trabaho.

“Gusto binabalik din natin sa management at nangangalaga sa amin, kung ano yun binigay at pinagkatiwala, sinusuklian dapat yun.”

Kaya wish pa ni Coco, “sana, nangangarap ako, nagdarasal ako na sana, hindi lang matapatan, kung maaari malampasan pa kung ano ang nagawa namin sa ‘FPJ’s Ang Probinsyano'”.

Huwag palampasin ang maaksyong pagbabalik ni Coco sa “FPJ’s Batang Quiapo” gabi-gabi tuwing ika-walo nang gabi sa Kapamilya Channel, A2Z, TV5, iWantTFC, at Kapamilya Online Live sa YouTube channel at Facebook page ng ABS-CBN Entertainment. I-rescan lang ang anumang digital TV box na ginagamit sa bahay, gaya ng TVplus box, para mapanood sa TV5 at A2Z ang mga bagong episode ng ““FPJ’s Batang Quiapo.” Mapapanood din ito sa labas ng Pilipinas sa pamamagitan ng iWantTFC at The Filipino Channel (TFC) sa cable at IPTV.

Para sa updates, sundan ang @abscbnpr sa Facebook, Twitter, TikTok, at Instagram o bisitahin ang www.abs-cbn.com/newsroom

(ROHN ROMULO)