TATLO, kabilang ang 20-anyos na bebot ang arestado matapos mahuli sa aktong mga pulis na sumisinghot umano ng shabu sa loob ng kanilang lungga sa Valenzuela City, kamakalawa ng hapon.

Kinilala ni Sub-Station 6 Commander PCPT Manuel Cristobal ang naarestong mga suspek bilang sina Manuelito Lopez, 47, construction worker, Yazzer Tizon, 36, kapwa ng Valenzuela City at Rocel Coronel, 20 ng Meycuayan, Bulacan.

Sa report ni PSSG Carlito Nerit Jr kay Valenzuela police chief P/Col. Salvador Destura Jr, dakong alas-12:45 ng hapon, nagsasagawa ng Oplan Galugad ang mga tauhan ng SS6 sa pangunguna ni PMSg Roberto Santillan, kasama sina PSSg Joel Carorocan, at PCpl Bryan Jay Bagtas sa Block 6 C. Molina Street, Brgy., Veinte Reales.

Dito, naaktuhan nila ang mga suspek na sumisinghot umano ng shabu sa loob ng kanilang lungga na isang butas sa pader na simento na naging dahilan upang arestuhin sila ng mga pulis.

Nakumpiska sa mga suspek ang isang unsealed transparent plastic sachet na naglalaman ng hinihinalang shabu na nasa P680,00 ang halaga at mga drug paraphernalias.

Ani PSSG Nerit, paglabag sa Section 11 (Possession of Dangerous Drugs), Section 12 (Possession of Drug Paraphernalia) at Section 15 (Use of Dangerous Drugs) under Article II of RA 9165 ang kanilang isasampang kaso laban sa mga suspek sa Valenzuela City Prosecutors Office. (Richard Mesa)