KILALANG mahuhusay na artista ang mga kasabayan ni Gabbi Garcia sa serye na ‘Unbreak My Heart’ tulad nina Jodi Sta. Maria at Joshua Garcia at iba pang supporting cast, pero nagawa ni Gabbi na hindi magpahuli at makipagsabayan sa mga ito.

“Siguro it’s really all hard work and disiplina po. And ang dami ko rin natutunan, especially sa mga directors. And also my acting coach, si Ms. Ana Feleo, so, ano siya, e, it’s a project that I really wanted to grow. It was intentional. Talagang may purpose, may intention na gusto kong mag-grow as an actor.”

Kahit daw siya sa sarili niya, nagulat daw siya na kaya raw pala niya.

‘Yun nga lang, dahil sa ginampanan niyang karakter, natatawa na lang si Gabbi nang ilahad na may mga nae-encounter raw siya at sinasabihan siyang ang sama niyang anak.

“Nakakaloka, kapag nagmo-mall ako, ‘yung mga nanay sa akin, ‘Uy, ang sama ng ugali mo. Nakakatawa.”

Nasa huling limang Linggo na lang ang ‘Unbreak My Heart’ na unang collaboration nga ng ABS-CBN, GMA-7 at VIU. Para kay Gabbi, ang nabuo raw niyang closeness kay Jodi ang isa sa babaunin niyang talaga sa UMH.

“Si Ate Jodi, isa siya sa mga surprisingly, hindi ko po talaga ine-expect talaga na maging ate ko siya, totoong ate ko siya hindi lang sa industriya but outside the industry.

“Sabi nga namin, iba ‘yung connection na na-build namin. Hanggang off-cam, jibe kami. Iba ‘yung closeness na na-build namin, iba ‘yung pagmamahalan namin.

“Kahit after ng show, pumupunta ko sa bahay niya. Hindi siya taping relationship and it’s rare for me to find that in this industry and I will really, really treasure that.”

***

WALANG duda na si Carren Eistrup ang pinaka-prime talent ng Merlion Entertainment artists.

Ipinakilala muli sa isang trade launch at dito nga nalaman na bukod kay Carren at sa girl group na ‘Calista,’ napakarami na palang mga talented artists ngayon na mina-manage ng kumpanya.

May grupo, singers, actor, chef, model, influencers. At sa lahat ng ito, masaya raw si Carren na parami sila nang parami.

“I’m very happy kasi Merlion is still new. And I’m happy that a lot of artists are coming and yes, I’m really happy with everything that’s happening right now.”

“The pressure is normal kasi, para sa akin po talaga nakatutok ang mga tao. Kasi nga, host and everything. Pero, everyone naman po is talented.”

Inamin naman ni Carren, nararamdaman naman daw niya na sa lahat, parang siya talaga ang considered the prime talent.

“Actually, yes, parang after I won the ‘Bida Next,’ they helped me to become better performer and sa showbiz, you have to keep improving.”

Nang magkaroon ng isyu sa pagitan ng dating Eat Bulaga at TAPE, Incorporated, inamin ni Carren na naapektuhan din siya.

“It’s so heartbreaking talaga,” sabi niya.

“Actually, natakot talaga ‘ko. Kaka-panalo ko lang and it started going downhill. So, I was so stressed. Tapos, kami ni Mommy, we had like a discussion kung ano ang gagawin ko.

“And I stayed with TVJ because I know, I’m happy with them. I know, they will treat me right and help me grow to become better.”

Masaya rin si Carren dahil may bago pa silang dabarkads, si Atasha Muhlach na kunsaan, inamin ni Carren na noong una, na-starstruck daw siya rito.

“Ang cute po ni Ate Atasha noong unang pasok niya. Kasi, kaming lahat na dabarkads, hindi namin alam na may bagong dabarkads pala na papasukin.

“Noong pinasok siya sa ‘Gimme 5’, grabe I was so shock kasi, I see her all the time. Kasi, anak po siya ni Aga Muhlach. Parang na-starstruck lang ako.

“She’s very kind, she’s very pretty and parang food buddy ko siya, kasi, kumakain kami palagi. Atasha’s favorite food is pancit,” natawang kuwento niya.

(ROSE GARCIA)

ANG pambato natin na si Michelle Dee ay isa na sa mga frontrunners sa nalalapit na 72nd Miss Universe pageant

Dahil pasok ang 28-year-old Kapuso actress sa Top 10 leading candidates na mula partial fan votes, base ito sa inilabas ng Miss Universe Organization sa kanilang facebook account last Oct. 13.

“It’s neck and neck.

“These are the delegates leading the Fan Vote as of Thursday, October 12th (in no particular order). Don’t see your favorite delegate? Download the MISS UNIVERSE app and cast your vote now!,” nakalagay sa caption kasama ng larawan ng mga candidate.

Kasama nga ni Michelle sa top 10 list ang mga kandidata mula sa France – Diana Leyre, Nicaragua – Sheynnis Palacios, Albania – Endi Demneri, Mexico – Melissa Flores, Myanmar – Amara Bo, Puerto Rico – Karla Acevedo, Chile – Celeste Viel, Thailand’s Anntonia Porsild, and Lebanon – Maya Abou Hosn.

Kapansin-pansin ang pagpasok ng apat na Latina, na matinding kalaban sa Miss Universe, idagdag pa ang kapwa-Asian beauties ni Michelle, na nagpapasalamat sa lahat ng bumoto sa kanya, at patuloy pa ring iboto para hindi siya malaglag sa semi finals.

Ang contestant na highest number of fan votes ay makasisiguro ng kanyang spot sa semifinals ng beauty pageant.

Hinahangad nga ni Michelle ang ikalimang Miss Universe crown para sa Pilipinas, at sundan ang pagkapanalo nina Pia Wurtzbach noong 2015 at Catriona Gray noong 2018. Kaya malaking pressure ito sa kanya, sa totoo lang.

Gaganapin ang 72nd Miss Universe sa November 18 sa El Salvador kung saan magtatagisan ang 87 delegates mula sa iba’t ibang bansa.

Eere naman ito sa Kapamilya channel.

***

EXCITING ang announcement today ng final four para makumpleto ang eight entries ng MMFF 2023.

Isa sa malakas ang laban at siguradong magpapasaya sa manonood this Christmas season ang comedy film na ‘Becky & Badette’ nina Eugene Domingo at Pokwang, sa direksyon at panulat ni Jun Robles Lana.

Type din naming makapasok ang drama adventure na ‘Firefly’ ni Zig Dulay na pinagbibidahan nina Alessandra de Rossi at Kapuso child actor Euween Mikael na kung saan may special participation si Dingdong Dantes.

Makalusot naman kaya sa panlasa ng committee ang action suspense drama na ‘Pieta’ nina Alfred Vargas at Nora Aunor, at isa pang dramatic film na ‘In His Mother’s Eyes’ nina Maricel Soriano, LA Santos at Roderick Paulate?

Tatlo naman ang pagpipilian na horror at thriller ang tema, ang ‘Nokturno’ ni Nadine Lustre mula sa Viva Films, ‘Shake, Rattle & Roll EXTREME ng Regal Films at ‘Mallari’ ni Piolo Pascual, sa direksyon ni Derick Cabrido na hatid naman ng Mentorque Productions.

At baka nga may iba pang makalusot, kaya good luck and congrats sa mga mapipili.

Mabuhay ang Pelikulang Pilipino.

(ROHN ROMULO)