NATATAWANG kinuwento ni Katrina Halili na hindi niya kaagad nalaman na skilled sexy assassin ang magiging role niya sa upcoming Kapuso drama-action series na Black Rider.

Kinuwento ni Katrina ang kanyang naging paghahanda sa kanyang role bilang si Romana.

“Medyo nahirapan po ako kasi kailangan kong dumaan sa mga trainings, sa big bikes, mixed martial arts, kung anu-ano,” sabi ni Katrina.

“Noong unang tinanggap ko po ito, wala akong idea na ganyan. Ang alam ko po, drug lord lang na mag-uutos-utos.

“Super shocked po ako na ang daming trainings po tapos ako po pala ‘yung gagawa ng action, akala ko taga-utos lang po!” tawa pa niya.

Nagduda tuloy sa sarili si Katrina kung magagampanan niya ang role.

“Una, skeptic po ako sa sarili ko kasi nasanay na po ako sa hapon na nanay, iyak-iyak. Pero noong ginagawa ko na po siya, na-e-enjoy ko po siya. Happy po ako, medyo umiksi-iksi na nga po ang katawan ko.

“Siyempre kinokondisyon ko ‘yung sarili ko na pumayat ako. Noong nalaman ko na sexy assassin, na-stress na po ako lalo. Tapos kasama ko sina Ruru tapos Matteo, mas lalo po akong na-stress. Sobrang stressed po ako noong nalaman ko kung sino ‘yung mga kasama ko.

“Pero okay lang, sa stress na ‘yun, at least pumayat po ako, naging maliksi ulit po ang aking katawan. Ang laking tulong na ibinigay sa akin ang role na Romana para lumapit-lapit ulit ako sa timbang ko dati.”

***

NAGULAT ang marami sa biglang pagpanaw ng komedyanteng si Joey Paras sa edad na 45.

Ang nagkumpirma nito ay ang pamangkin ni Paras na si Zciara Shyne Sinchon-Fabian at pinost niya ito sa Facebook.

Hindi binanggit ang dahilan ng pagpanaw ni Joey pero matagal na ito may sakit sa puso. Noong 2018 ay kinabitan ito ng pacemaker.

Napag-alaman na hindi iyon ang unang pagkakataon na inoperahan siya sa puso. Noong October 2016, sumailalim na rin siya sa angioplasty.

Bumuti umano ang kanyang kondisyon matapos ang unang operasyon hanggang nakaranas siya biglang pag-black out o nawalan ng malay habang may ginagawang eksena.

Nang sumailalim siya sa ilang pagsusuri, nakitang mataas ang sugar level sa kanyang dugo at may irregularity sa tibok ng kanyang puso. Nakaranas din daw siya nang matinding palpitations kaya minabuti na niyang magpaospital noong 2018.

Nagbida si Paras sa comedy film na Bekikang noong 2013. Ilan pang pelikulang nagawa niya ay Sisterakas, Working Beks, Momzillas, Dance of the Steel Bars, Bromance, Bwakaw, Born Beautiful at mga indie films na Last Supper No. 3 at Babagwa kunsaan nanalo siya ng best supporting actor sa Cinemalaya.

Sa TV ay lumabas si Paras sa Sunday Pinasaya, Princess in the Palace, The Last Prince, Flordeliza, Galema, Mulawin Vs. Ravena, Daldalita, Ikaw Sana, Hindi Ka Na Mag-iisa, at I Heart You Pare.

(RUEL J. MENDOZA)

NAGANAP ang pagbibigay-basbas ng orihinal na Sang’gre sa bagong Sang’gre at ito ay sa katauhan nina Iza Calzado at Angel Guardian.

Tulad ng inanunsiyo na, isa si Angel sa mga bagong Sang’gre sa upcoming fantaserye ng GMA na Sang’gre: Encantadia Chronicles.

Tiyempo naman na magkasama sina Iza at Angel sa pelikulang Shake Rattle & Roll Extreme kaya doon ay nagkita sila at nagkausap ng personal.

“When I got the call that I’d been casted as Sang’gre Deia, I prayed to see her on our taping kahit one day lang cause I really wanted to talk to her if given a chance. God made it happen,” paglalahad ni Angel sa kanyang Instagram account.

“Nilakasan ko ang loob ko and asked her, I found out they’d asked for her permission to use her daughter’s name, Deia. We got emotional, I saw how special Deia is to Ms. Iza. It made me realise how lucky I am to be carrying such a deeply special name.

“We talked and hugged a lot, I felt as if I was on cloud nine and dreaming, so she told me to take a picture and this was it. Haha.”

Si Iza ang unang naging tagapangalaga ng brilyante ng hangin na si Amihan sa Encantadia na umere sa GMA noong 2005 samantalang si Angel naman ang bagong tagapangalaga ng brilyante ng hangin na si Deia kasama sina Bianca Umali, Faith Da Silva, at Kelvin Miranda.

Sa Instagram post pa rin ni Angel ay ibinahagi niya ang pagbati ni Iza sa kanya.

“Hello, anak! I saw online that they have already announced the characters for Sang’gre and your participation in it.

“I wish you all the best as you embark on this journey of playing/being Deia. May it bring you the break you so deserve! Alagaan mo si Deia ha. Hehe! Love you,” ang mensahe ni Iza.

Ang pangalan ng karakter ni Angel ay mula sa pangalan ng anak na babae ni Iza na si Deia Amihan.

“The very first thing I saw when I woke up the next day after our cast reveal. And the very thing I would be praying to see. A message from the mom of Deia Amihan, Ms. Iza Calzado,” umpisang sagot naman ni Angel sa mensahe ni Iza.

“I don’t ever want to start saying I’m Sang’gre Deia without acknowledging the real reason why the name Deia exists. To Ms. Iza, thank you so much for this very beautiful name and thank you sa pagpayag na gamitin ang pangalan ng pinaka espesyal na tao sa buhay mo–your beautiful baby, Deia Amihan.

“I’m beyond grateful na nagkaroon ako ng chance makausap ka personally, and makuha ang basbas mo. Thank you for being you, a very warm and wonderful person. Thank you for sharing your knowledge, compassion, and words of encouragement to me with portraying this role.

“I know how special Deia is to you, and I want to say it again… I won’t disappoint you. I’ll take good care of Deia and carry this name with kindness, power, and grace. Thank you my forever favorite, Amihan @missizacalzado.”

Nagkasama na sina Angel at Iza sa dalawang horror films; una ay sa White House noong 2010 at pangalawa naman ay sa Shake Rattle & Roll Extreme na ipapalabas ngayong Nobyembre 29 dahil hindi ito nakapasok sa Metro Manila Film Festival sa Disyembre.

***

HINDI nauubusan ng pasabog si Ms. Jessica Soho.

Sino ba naman kasi ang mag-aakalang marunong siyang… mag-Tiktok?!

Sa recent na guesting ni Herlene Budol sa “Kapuso Mo Jessica Soho” ay nagkulitan sina Jessica at ang Magandang Dilag star na si Herlene kung saan napapayag ni Herlene, na mahilig gumawa ng Tiktok videos, si Miss Jessica na maki-Tiktok sa kanya!

Dalawang Tiktok videos ang in-upload ni Herlene sa kanyang Tiktok app kung saan buong ningning na napasayaw, napakembot at napagiling niya si Ms. Soho, huh!

First time, sa pagkakaalam namin, na napa-Tiktok si Miss Jessica kaya naman naaliw nang husto ang publiko dahil nakita nila ang isang cool and chill side ng batikan at multi-awarded broadcast journalist.

(ROMMEL L. GONZALES)

TULOY na tuloy na ang inaabangang ika-anim na edisyon ng The EDDYS o Entertainment Editors’ Choice ng Society of Philippine Entertainment Editors (SPEEd) ngayong taon. Matapos ma-postpone ang nakatakda sanang awards night nitong nagdaang October 22, inanunsyo na ng pamunuan ng SPEEd, sa pamamagitan ng Presidente nitong si Eugene Asis, magaganap na ang Gabi ng Parangal sa November 26, Linggo.

Ang pagbibigay parangal at pagkilala ng 6th The EDDYS sa mga natatanging pelikulang Pilipino nitong nagdaang taon ay magaganap sa Aliw Theater, CCP Complex, Pasay City. Ito’y mula sa direksyon ng award-winning actor-director na si Eric Quizon. Magsisilbing host naman ng awards night ang premaydong aktor at producer na si Piolo Pascual. Ang sixth edition ng The EDDYS ay ihahatid ng Airtime Marketing Philippines ni Tessie Celestino-Howard. Magkakaroon din ito ng delayed telecast sa A2Z Channel.

Ang limang pelikulang Pilipino na nagmarka noong nakaraang taon ang maglalaban-laban sa 6th EDDYS.
Ang mga nominado sa Best Film ay ang “Bakit ‘Di Mo Sabihin?” ng Firestarters at Viva Films; “Blue Room” mula sa Heaven’s Best Entertainment, Eyepoppers Multimedia Service at Fusee; “Doll House” ng MavX Productions; “Family Matters” ng CineKo Productions; at “Nanahimik ang Gabi” mula sa Rein Entertainment. Nominado naman sa pagka-Best Director sina Marla Ancheta (Doll House); Ma-an L. Asuncion-Dagñalan (Blue Room); Real S. Florido (Bakit ‘Di Mo Sabihin?); Nuel Crisostomo Naval (Family Matters); at Shugo Praico (Nanahimik ang Gabi). Magpapatalbugan para sa Best Actress category sina Kim Chiu (Always); Max Eigenmann (12 Weeks); Janine Guttierez (Bakit ‘Di Mo Sabihin?); Nadine Lustre (Greed); Heaven Peralejo, (Nanahimik ang Gabi); at Rose Van Ginkel (Kitty K-7).

Bakbakan naman sa pagka-Best Actor sina Elijah Canlas (Blue Room); Baron Geisler (Doll House); Noel Trinidad (Family Matters); Ian Veneracion (Nanahimik ang Gabi); at JC de Vera, (Bakit ‘Di Mo Sabihin?). Paglalabanan naman nina Mylene Dizon (Family Matters); Matet de Leon (An Inconvenient Love); Althea Ruedas (Doll House); Ruby Ruiz (Ginhawa); at Nikki Valdez (Family Matters) ang tropeo para sa kategoryang Best Supporting Actress. Para sa Best Supporting Actor, nominado sina Nonie Buencamino (Family Matters); Mon Confiado (Nanahimik ang Gabi); Soliman Cruz (Blue Room); Sid Lucero (Reroute); at Dido dela Paz (Ginhawa). Ang annual event na ito na mula sa samahan ng mga entertainment editors sa Pilipinas ay nagbibigay ng pagkilala at pagpapahalaga sa mga pelikula at personalidad na itinuturing na “best of the best” sa Philippine Cinema.

Ang SPEEd ay binubuo ng mga current at former entertainment editors ng mga leading newspaper at online site sa Pilipinas. Ang pamamahagi ng parangal ng SPEEd ay isang paraan din para hikayatin, lalong pataasin ang morale at patuloy na magbigay-inspirasyon sa Filipino filmmakers, producers, writers, actors at iba pang kasama sa pagbuo ng isang matino at dekalibreng pelikula.

(ROHN ROMULO)