MASAYANG-MASAYA si Star for All Seasons Vilma Santos at feeling nasa cloud nine, nang malamang kasali ang reunion movie nila ni Christopher de Leon, ang “When I Met You in Tokyo” sa 49th Metro Manila Film Festival sa December.

Nagpasalamat si Ate Vi sa Metropolitan Manila Development Authority (MMDA) na nakasama ang kanilang movie.  Excited din si Ate Vi na mag-promote at lumahok sila sa Parade of Stars sa December 17 na nagsisimula sa Navotas, dadaan sa Malabon at Caloocan, at magtatapos sa Valenzuela.

Sigurado rin daw na magpu-promote si Ate Vi ng movie, at isa sa maggi-guest siya ay sa last day ng “It’s Your Lucky Day”, hosted by her son Luis Manzano.  Kinuha kasi si Ate Vi na mag-judge sa grand finals doon ng singing competition na “Stars of All Seasons.”

***

MARAMING artista at celebrities ang sumuporta kina Alden Richards at Julia Montes sa premiere night ng first movie team-up nila, ang “Five Breakups and A Romance” sa SM Megamall last Wednesday, October 18, na produced ng GMA Pictures, Cornerstone Studio at Myriad Productions.

Ilan sa mga sumuporta sina Kapamilya actress Kathryn Bernardo na kasama si Miles Ocampo.  Dumating naman among the Sparkler Artists sina Ruru Madrid at Bianca Umali, Sanya Lopez, Dion Ignacio, Kelvin Miranda at naroon din sina Direk Gina Alajar at Lorna Tolentino.

Hindi nakitang rumampa sa red carpet si Megastar Sharon Cuneta, pero sa Instagram video ng GMA-7, nakita siyang maluha-luhang hinahalikan at niyakap ang mga anak niyang sina Alden at Julia na maluha-luha ring yumakap sa nanay-nanayan nila sa showbiz.

Kaya comment ng mga fans, “one proud mama si Sharon,” “aaw, so supportive si Ma’am Sharon, ang sweet niya!” “Ito ang gusto ko kay Sharon, anak talaga ang turing niya sa mga nakakasama niya, minamahal niya.”

Marami tuloy ang nagsasabi na malamang susuportahan naman nina Alden at Julia, ang coming “Dear Heart: The Concert” nina Sharon at Gabby Concepcion sa SM Mall of Asia Arena sa October 27.

Susunod namang magpu-promote sina Sharon at Alden ng movie nilang  “Family of Two (A Mother and A Son Story)” na isa sa 10 movies na ipalalabas sa 2023 Metro Manila Film Festival.

                                       ***

CONGRATULATIONS kay Kapuso It Girl Gabbi Garcia, ang first Filipina Global ambassador for Aldo.

Ginawa ni Gabbi ang announcement sa kanyang Instagram na nagpapasalamat siya sa pagkuha sa kanya para maging brand’s official Instagram handle.

Isang Canadian fashion retailer ang Aldo na may stores across the Philippines that specializes in trendy shoes, bags, jewelry, sunglasses, na tiyak na nagagamit ni Gabbi sa mga eksena niya sa “Unbreak My Heart,” ang historic collaboration ng GMA Network at ABS-CBN, na ayon kay Gabbi ang role niya bilang si Alexandra is her “most mature role” to date.

Kasama rito ni Gabbi sina Joshua Garcia, Jodi Sta. Maria and Richard Yap, na napapanood Mondays to Thursdays on GMA Telebabad, Pinoy Hits and I Heart Movies at 9:35p.m. and at 11:25 p.m. on GTV.  Napapanood din ito sa Viu.

(NORA V. CALDERON)

BIRTHDAY ni Samantha Lopez kahapon, October 18, pero hindi kasali sa mga birthday wishes niya ang magkaroon ng lovelife.

Kahit single siya ngayon ay happy naman raw siya.

“You know, kung may darating, kung may ibibigay si God, then, yeah, why not? Pero okay na rin, masaya naman, busy.”

Sabagay, halos wala na siyang oras para sa sarili niya lalo pa nga at idinaos niyang muli ang [3rd] SamLo Cup, ang kanyang taunang celebrity golf tournament.

Hands-on si Samantha sa kayang ganap, ultimo pag-aabot ng prizes sa raffle at table assignments sa lunch at awarding ceremony ay siya ang aligaga.

Kahit nangarag siya the night before ng SamLo Cup (October 17 ito ginanap) sa Wack Wack Golf and Country Club sa Mandaluyong dahil may mga nag-backout last minute.

“Si Tonton Gutierrez, nagkasakit, si Glydel Mercado, biglaang may taping, si Maricel Morales at husband niya nagkaroon ng emergency sa Pampanga,” kuwento pa ni Samantha.

Sa kabila nito, well-attended ang SamLo Cup; dumating sina Christopher de Leon at misis niya na cast member ng Magandang Dilag na si Sandy Andolong, Glenda Garcia na abala sa bagong GMA series ni Jo Berry, si Maey Bautista, Janelle Jaymer, Randy Santiago at Dingdong Avanzado na parehong nag-mini concert, same with 6Cyclemind vocalist na si Tutti Caringal na ang ganda pala ng katawan at ang hot mag-perform, Geneva Cruz na umawit kasama ang mga bata ng Kids For Jesus Foundation na beneficiary ng SamLo Cup, Cesar Montano at si Derek Ramsay minus Ellen Adarna.

Ngayong nairaos na niya ang SamLo Cup, balik-showbiz si Samantha dahil sabay siyang nagte-taping ‘for Love. Die. Repeat’ with Jennylyn Mercado for GMA at ‘Good Will’ for Net 25, produced by Korina Sanchez.

***

TINANONG namin si Elsa Droga kung paano niya naha-handle ang bashers?

“How do I handle bashers? For me bashers will make you famous, so ako pag may nangba-bash sa akin dine-deadma ko na lang.

“Kasi lahat naman tayo nagkakamali, kung may pagkakamali man tayo, deadmahin lang natin yung mga bashers, kasi hindi yan makakatulong e, parang pag pinatulan mo sila mas lalo ka nilang iba-bash, so para sa akin ang bashers treat them like a ghost, kumbaga binibigyan ka nila ng pagkakataon para mas lumakas pa yung loob mo, tatagan mo yung pagkatao mo, as long as bina-bash ka nila deadmahin mo na lang.”

Grand finalist sa segment na Miss Q and A ng ‘It’s Showtime’ noong 2018 si Elsa Droga kung saan siya sumikat kaya hiningan siya ng comment tungkol sa suspension ng naturang noontime show na nagsimula noong Oct. 14.

“Nakakalungkot po, kasi naging pamilya po namin ang Showtime e so… doon po ako nakilala, parang sa akin isa yun sa mga platforms na nagpapakilala ng iba’t-ibang klase ng tao, sila yung nagpapakilala sa buong mundo ng mga may potential

“So nung nalaman ko na suspended ang Showtime nakakalungkot siya. “Pero may mga platforms po na napapanood pa din ang Showtime, so ang nakakadismaya lang po sa amin is sana mabigyan ng pagkakataon ang Showtime na maipalabas uli sa television, dahil ang Showtime family po is lagi pong nagbibigay ng kasiyahan sa mga taong nalulungkot, sa mga taong depressed.

“Showtime is the best talaga, kaya sana bigyan ng pagkakataon ng MTRCB ulit.”

Latest project ni Elsa ang “Online In Love (Influencers Series)” kung saan introducing sa lead roles sina Gab Rosales at Daniel Bautista, kasama sina Jassy Calupitan, Jewel Gines, Marissa Joelle, Pink Rose, at Oreo Libios.

Ang limited online series na ito ay sinulat ni Eldrin Veloso, at ang executive producer ay si Marissa Joelle (na kandidata rin sa Mrs. Philippines 2023), line produced by Mabuhay PH, at sa direksyon ni Jag Cruz isang indie filmmaker na siya ring director ng “A Journey With Joanna Marie” na isang lifestyle show aired over Light TV.

Mapapanood ang Online In Love ngayong Nobyembre 2023 sa Youtube at iba pang streaming platforms.

(ROMMEL L. GONZALES)