NAGING matagumpay ang ika-anim na edisyon ng The EDDYS (Entertainment Editors’ Choice) ng Society ng Philippine Entertainment Editors (SPEEd), na ginanap sa Aliw Theater sa Pasay City noong Nobyembre 26.

Nagningning nga ang pinakamahusay sa paggawa ng pelikulang Pilipino para sa taong 2022, pati na ang natatanging pagganap ng mga aktor at aktres.

Big winners ang “Blue Room” at “Family Matters” sa katatapos lang na awards night, na parehong tinanghal na Best Film.

Ang Best Director ay ipinagkaloob kay Nuel Crisostomo Naval para sa “Family Matters”.

Nag-tie naman sina Max Eigenmann at Janine Gutierrez sa Best Actress award para sa kanilang nakabibilib na pagganap sa “12 Weeks” at “Bakit ‘Di Mo Sabihin?”

Ang 5th EDDYS Best Supporting Actress na si Lotlot de Leon ang tumanggap ng tropeo para sa kanyang anak.

Hindi nga napigilan ni Lotlot na maging emosyonal sa kanyang speech, “Alam n’yo po, pangarap ko talaga na makatanggap ng Best Actress award, ‘yun pala tanggapin ko, ‘yung sa anak ko.

“Janine, I’m so proud of you, my darling!”

Inialay naman ni Max ang award sa kanyang ina na si Bing Pimentel, na kasama rin niya sa “12 Weeks”.

Si Elijah Canlas ang nakasungkit ng Best Actor award para sa mahusay niyang pagganap sa “Blue Room”.

Tulad ng inaasahan nang nakararami, si Nikki Valdez ang nakapag-uwi ng tropeo ng Best Supporting Actress para sa kanyang ‘di matatawarang pagganap sa “Family Matters.”

Nakagawa naman ng EDDYS history si Mon Confiado na tumanggap ng ikalawang Best Supporting Actor award para sa kanyang nakakikilabot na pagganap sa “Nanahimik ang Gabi,” dahil siya rin ang nagwagi sa last year sa ‘5th The EDDYS’, para sa pelikulang “Arisaka”.

Ginawaran ng Best Screenplay si Mel Mendoza del Rosario para sa “Family Matters”, habang ang Best Cinematography ay nakuha ni Moises Zee para sa “Nanahimik ang Gabi”.

Si Marxie Maolen Fadul ay tumanggap ng parangal bilang Best Production Design, samantalang si Vanessa de Leon ang kinilala sa Best Editing, na pawang para sa “Blue Room”,

Isa pang award ang nasungkit ng “Blue Room”, wagi sina Jazz Nicolas at Mikey Amistoso ng Best Musical Score, habang ang Best Sound Design ay napagwagian nina Andrea Teresa Idioma at Emilio Bien Sparks para sa “Nanahimik ang Gabi”.

Ang awiting “Sa Hawak Mo” ang nagwaging Best Theme Song na mula sa “Family Matters”.

Sina Carl Regis Abuel, Tricia Bernasor at Geraldine Coa ng “Live Scream” ang nagwagi sa Best Visual Effects.

Ang awards night ay idinirek ni Erik Quizon, hosted by Piolo Pascual and Iza Calzado. Nasaksihan din ang natatanging pagtatanghal nina Pops Fernandez, Darren Espanto, Erik Santos, at P-pop group na Calista.

Hindi magiging matagumpay ang 6th The EDDYS, kung wala ang pagsuporta ng Beautederm, Globe Telecom, Shopee, at Tough Mama.

Pinasasalamat din ang auditing firm ng Juancho Robles, Chan Robles & Company, CPAs, na nagsilbing auditor ng mga boto.

Special thanks din kay Ms. Angeli Pangilinan-Valenciano ng Sound Check, Beautederm loot bags, at sa foods na pinadala ni Ms. Mhae Sarenas ng Echo Jham Entertainment Production.

Prinoduce ito ng SPEEd sa pakikipagtulungan sa Airtime Marketing Philippines ni Ms. Tessie Celestino-Howard, magkakaroon ng delayed telecast ang 6th The EDDYS sa ika-2 ng Disyembre sa A2Z.

(ROHN ROMULO)

EVENTFUL para sa amin ang November 26, 2023, Linggo ng gabi.

Sinamahan namin si Lotlot de Leon na pumunta sa Aliw Theater sa Roxas Boulevard para maging presenter sa 6th The EDDYS Awards ng Society of Philippine Entertainment Editors o SPEED na karamihan sa mga opisyales at miyembro ay mga kaibigan namin.

Dahil si Lotlot ang nagwagi last year, 2022, sa The EDDYS bilang Best Supporting Actress (para sa ‘On The Job: The Missing 8’) akala namin ay sa parehong kategorya siya magpe-present.

Sana nga ay kasama rin namin si Janine Gutierrez nitong Linggo ng gabi dahil nominado ang anak ni Lotlot bilang Best Actress para naman sa pelikulang ‘Bakit ‘Di Mo Sabihin?’.

Pero may prior commitment na si Janine kaya si Lotlot lamang ang tumungo sa venue bilang presenter.

Sa awards ceremonies, nagtaka kami dahil si Ara Mina ang tinawag para mag-present sa Best Supporting Actor at Actress category.

In-assure naman kami ng entertainment editor ng People’s Balita at opisyal ng SPEEd na si Rohn Romulo at entertainment editor ng HATAW tabloid na opisyal rin ng SPEEd na si Maricris Valdez na may mas magandang partisipasyon si Lotlot sa gabi ng parangal.

Noong tinawag si FDCP Chair Tirso Cruz III para mag-present ng award sa kategoryang Best Actor at Best Actress, sumagi sa isip namin, malamang ay inilagay si Lotlot sa kategoryang Best Picture kasi walang binanggit tungkol sa kategoryang iyon.

Mali kami.

Mas bongga nga ang pag-akyat ni Lotlot sa entablado dahil nanalong Best Actress si Janine at si Lotlot ang tumanggap ng parangal para sa anak.

Na kung saan naka-tie ni Janine bilang Best Actress si Max Eigenmann para naman sa pelikulang ’12 Weeks’.

At bahagi ng madamdaming speech ni Lotlot habang umiiyak…

“Ako po si Lotlot! Alam niyo po, pangarap ko talaga, makatanggap ng Best Actress award.

“Yun pala, ang tatanggapin ko, yung sa anak ko!

“Janine! I’m so proud of you!”

Matapos ang awards night ay nakapanayam si Lotlot ng ilang press people sa lobby ng Aliw Theater.

“Iba pag anak, e. I’m so proud of her.”

Sa tanong naman kung kung paano niyang sinusuportahan si Janine ngayong balitang single na raw ito.

“You know what, ang importante masaya ang puso whether she’s single or not single.”

Patuloy na umuugong ang balitang break na sina Janine at Paulo Avelino sa kabila ng katotohanang walang direktang pag-amin mula sa dalawa kung magkarelasyon nga ba sila.

Kilala si Janine na mahusay magdala at sumagot sa mga intriga tungkol sa kanya, sa career man o sa personal na buhay.

“Mas magaling mandeadma yung anak ko kesa sa akin. Yung anak ko, parang na-practice na niya na hindi lahat, pinapatulan.

“So, sa totoo lang, wala siyang ano sa mga tsismis,” sinabi pa ni Lotlot.

(ROMMEL L. GONZALES)

MAGSASAMA sa bagong version ng ‘Karate Kid’ sina Ralph Macchio at Jackie Chan.

Si Ralph ang gumanap bilang si Daniel LaRusso sa original ‘Karate Kid’ film noong 1984. Nakasama niya sa film ay si Pat Morita na gumanap na Mr. Miyagi. Pumanaw si Morita noong 2005.

Sa remake ng The Karate Kid noong 2010, si Jackie Chan ang gumanap na bagong trainer na si Mr. Han. Ang tinuruan niya ay ang bata pa lang noon na si Jaden Smith (na anak ni Will Smith).

“Hi everyone, we’ve got big news,” sabi ni Jackie sa isang video announcement.

“We’re starring in a new ‘Karate Kid’ movie together,” dagdag naman ni Ralph na kasama si Jackie.

Naghahanap din sila ng susunod na Karate Kid at magkakaroon ng global auditions.

“The global search for the star of our new film starts right now. So let’s wax on, wax off, everybody,” ayon kay Ralph na patungkol sa iconic line ni Mr. Miyagi mula sa 1984 movie.

Isiningit naman ni Jackie ang kaniyang linya noong 2010: “You mean, jacket on, jacket off, hang it up?”

Ayon kay Ralph, “Maybe the new Karate Kid will have to do it all.”

Batay sa casting guidelines sa KarateKidCasting.com, hinahanap nila ang aktor na gaganap bilang Chinese o mixed-race Chinese na nasa edad 15 hanggang 17.

Dapat na mahusay sa Ingles, at magiging plus factor ang marunong ng Mandarin. Mas maganda rin kung marunong ng martial arts, movement, gymnastics, at dance.

Shooting will start March hanggang June 2024.

(RUEL J. MENDOZA)

MASAYANG nagkuwento si Aubrey Miles sa magandang pagbabago sa anak nila ni Troy Montero na si Rocket matapos ang ilang buwan na gamutan at therapy.

Isa nga raw itong milagro para sa kanilang pamilya.

Sa Instagram post, nagbigay ng update si Aubrey tungkol sa kanyang anak na mayroong autism spectrum disorder (ASD).

“From not being able to take pictures to this. Still a working progress but this will do. Being able to stand still as a kid on the autism spectrum is huge. Smiling is a bonus. From not talking and now copying every word we say is a miracle,” caption pa ni Aubrey sa Instagram.

Ayon kay Aubrey, sumailalim si Rocket sa stem cell therapy at hyperbaric oxygen therapy noong nakaraang August. Sumailalim din si Rocket sa speech and occupational therapy.

Noong nakaraang taon lang isinapubliko nila Aubrey at Troy ang pag-diagnosed kay Rocket, who was 4-years old then, na may ASD.

“‘Yung relationship namin ni Troy, parang, ‘may ibibigay pa pala tayo.’ Akala mo ito na yung best love. Hindi pa pala, so ang dami lang namin natutunan,” sey ni Aubrey sa magandang natutunan nila sa kanilang anak.

***

VERY mother daw si Rufa Mae Quinto kapag nasa Amerika ito.

Enjoy daw siyang um-attend sa school activities ng anak na si Alexandria Athena.

“Yes, very mother ako doon. Hinahatid ko si Athena sa school tapos active din ako sa ilang programs sa school kasama ang ibang parents.

“Ibang-iba ako doon kasi hindi ako celebrity doon. As in, normal na mommy ako doon. Nagustuhan ko nga kasi ang dami kong time with my daughter,” sey ni Rufa Mae.

Nandito ngayon sa bansa ang Kapuso comedian dahil kasama siya sa latest offering ng SparkleU na ‘#Ghosted kunsaan’ bida ang Team Jolly nila Sofia Pablo at Allen Ansay.

“Work, work, work tayo dito ngayon. Ako yung ghost na tumatakot sa mga students sa Sparkle U. Enjoy akong ka-work ang mga bagets dito. Si Sofia ang gandang bata at si Allen ang guwapo. At ang gagaling at ang babait nila,” sey pa ni Rufa Mae.

Back and forth ang biyahe ni Rufa Mae sa Pilipinas lalo na kung maganda ang mga projects na gagawin niya.

“Ganu’n-ganun. Half-half. Hindi nila mahahalata kung aalis ako. Siyempre, more on Philippines pa rin kasi na-miss ko kayong lahat. Pero priority ko pa rin ang family ko sa US.”

(RUEL J. MENDOZA)