KAHIT kagagaling lamang sa sakit ay lumagare na sa trabaho si Lotlot de Leon.

Nag-negatibo naman siya sa swab test para sa COVID-19 pero matinding ubo at sipon ang dumale sa mahusay na aktres ilang araw bago mag-Pasko.

Mabuti na lamang at isang araw bago ang taping niya para sa ‘Makiling’ na bagong serye ng GMA ay gumaling na siya, at mabuti na rin ang pakiramdam niya sa bisperas ng Pasko.

Kaya naman Christmas day mismo ay nakapagluto pa siya ng mga pagkain, tulad ng liempo, na request kay Lotlot ni Janine Gutierrez.

Tuwing Pasko, mismong December 25  ay dumarating ang lahat ng mga anak ni Lotlot na sina Janine, Jessica, Diego at Maxine Gutierrez para doon maghapunan kasama sina Lotlot at mister nitong si Fadi El-Soury.

After Christmas ay tumungo naman sa Batangas si Lotlot para sa shooting ng isang bagong pelikula na hindi pa maaaring isulat ang mga detalye.

Samantala, haping-happy si Lotlot dahil malakas ang kinikita sa box-office ng ‘When I Met You In Tokyo’ na reunion movie ng ama niyang si Christopher de Leon at Star for All Seasons na si Ms. Vilma Santos.

Isa nga ang nabanggit na pelikula na pinipilahan ng mga moviegoers na nagbabalik-sinehan na matapos ang mahabang panahon ng pandemya.

Saksi kami na ang susyal at high-end na Glorietta 4 sa Makati ay pagkahaba-haba ng pila ng mga taong bumibili ng tickets at halos lahat ng sinehan ay puno, tulad ng mga sinehan sa naturang mall na pinagpapalabasan ng -‘When I Met You In Tokyo,, ‘Rewind’ at “Firefly.’

Sana nga, tuluy-tuloy na ang muling panonood ng sine ng publiko at sana rin nga, bumaba na ang presyo ng tickets para makapanood ng pelikula.

***

AGREE kami ng one hundred percent sa pahayag ni Heart Evangelista na hindi dapat ginagawang Christmas gift ang aso, pusa o anumang hayop.

Ayon kay Heart ang pagpapa-ampon at pagbibigay ng pet ay dapat na may tamang dahilan at rason at hindi dapat basta-basta na lamang nagreregalo ng pet animals.

“I’m really against that,” mariing sinabi ni Heart, “ako, hindi ko maintindihan kahit yung sa simpleng birthday party na merong rabbits na ipinamimigay or animals na pinamimigay.

“Kasi buhay yun e, kailangang maging choice yun ng kung sino man ang kukuha na mabigyan ng magandang buhay ang aso o ang pet na ibinibigay sa kanila.

“So dapat choice nila ‘yun. It never should be a gift.”

May proseso ang pagbibigay at pagtanggap at pag-aalaga ng aso o anumang uri ng pet.

“Unless matagal na talagang gusto ng pamilya, ng anak na magkaroon ng aso, at whether maalagaan ng bata or not, the parents would be 100% there. So yes, okay,” lahad ni Heart.

“But you always have to adopt a pet for the right reasons.”

May ilang tips pang inihayag si Heart tungkol sa pag-aalaga ng mga hayop sa darating na Bagong Taon na may mga putukan dahil sa fireworks bilang takot sa ganoong malalakas na ingay ang mga hayop lalo na ang mga aso.

“Usually pag ganiyan, talagang mine-make sure namin they’re in a room, naglalagay din kami ng towels as much as possible sa mga butas ng pinto. We try to make the room as soundproof as possible.

“Pero the reality is hindi rin siya 100% soundproof. So as long as they are with their loved ones at mga kasama sa bahay at lagi silang pine-pet, just keep them calm, that’s the best thing you could do. But hindi dapat sila ‘yung nakatali o nakakulong sa labas,” saad pa ni Heart.

(ROMMEL L. GONZALES)

ISANG napapanahon na pelikula ang hatid ng award-winning writer-director na si Njel de Mesa, ang “Must Give Us Pause,” na tungkol sa mga taong nawalan ng minamahal sa buhay nung pandemya at hindi man maayos na makapagpaalam.

Ang “Must Give Us Pause” na idinirehe, isinulat, at prinodyus ni Direk Njel na ang mga katauhang ginampanan ng mga bida ay magsisilbing hudyat sa ating mga puso at isipan para lalong mahalin ang ating mga buhay.

Ang pelikulang ito ay may malalim na paksang tumatalakay sa mental health at suicide isang tema na kailanman ay hindi dapat nawawala sa ating pansin.

“Iyakan kami parati sa set. Intense ang mga eksena dahil mahuhusay ang mga artista namin,’ pahayag ni Direk Njel.

Tampok sa pelikula ang dating ka-love team ni Sam Concepcion na si Cheska Ortega, sa rating musical film na “Pop Class” na pinagtulungan ni Direk Njel at Direk Paul Soriano.

Kasama rin ang NDM talent na si Shaneley Santos na talaga nga namang todo todo at sunud-sunod ang projects sa NDMstudios.

“Napakaganda po at kakaiba ang pelikula namin kasi wala pang tumatalakay sa impact ng mga namatayan nung pandemya, na hindi man lang nila nasamahan sa ospital ang mga mahal nila sa buhay,” sabi ni Shaneley.

Ang “Must Give Us Pause” ay hindi lamang isang drama. Ito ay isang mahalagang salamin ng realidad na kinakaharap ng maraming tao sa ating lipunan. Ito ay puno ng mga eksena na magdudulot ng mga luha at damdamin na magpapakilala sa atin sa mga taong patuloy na lumalaban sa kanilang mga personal na laban.

Ang kagandahan at pagiging kontrobersyal ng “Must Give Us Pause” ay naka-angkla sa kanyang paksa, ang mental health at suicide, mga usaping madalas na itinatabi ngunit kailangang harapin.

Kinunan ang kabuuan ng “Must Give Us Pause” sa Singapore, sa pakikipagtulungan ng Singapore Tourism Board na nagbigay ng kahanga-hangang backdrop sa pelikula.

Ang pagkakataong ito ay nagbigay-daan upang maipakita ang kahanga-hangang kultura at magagandang tanawin ng Singapore habang tinatalakay ang mahahalagang isyu.

Hindi maipagkakaila na ang “Must Give Us Pause” ay isang makabagbag-damdamin na pelikula na naglalayong magbuhat sa atin sa ating mga upuan, pukawin ang ating mga isipan, at hikayatin ang bawat isa na maging bahagi ng pag-uusap patungkol sa mental health at suicide.

Kasama natin ang buong mundo, sa pagsasabay-sabay na pagharap sa reyalidad ng mental health at suicide. Sa pamamagitan ng “Must Give Us Pause”, tayo ay magiging saksi sa mga kuwentong hindi lamang magpapaluha, kundi magpapabago rin ng pagharap sa buhay.

Malapit na itong ipalabas sa mga sinehan na sa susunod na taon.

(ROHN ROMULO)

RAMDAM mo ang happiness kay LJ Reyes nang mag-celebrate ito ng first Christmas kasama ang kanyang mister na si Philip Evangelista. 

Noong nakaraang Pasko, Mrs. Evangelista na si LJ.

Kasama sa Christmas photo nila LJ at Philip ang kanyang mga anak na sina Ethan Akio and Summer Ayana. Mga anak nito ni LJ sa mga dating partners na sina Paulo Avelinon at Paolo Contis.

Caption pa ni LJ: “I can’t ask for more in this lifetime. Merry Christmas everyone!”

Kinasal sina LJ and Philip noong October 7 sa The Bevin House in New York. Tumira si LJ sa New York kasama ang mga anak noong 2021 pagkatapos silang maghiwalay ni Paolo Contis. Nakilala niya si Philip a year after at ngayon ay mag-asawa na sila.

Mukhang wala pang balak na umuwi ng Pilipinas si LJ dahil wala naman siyang dahilan para magbakasyon dito. Nasa New York na ang kanyang kapatid at ina, pati na ang mga anak niya.

Kung showbiz career ang pag-uusapan, mukhang kuntento na si LJ sa narating niya dahil nanalo na siya ng best actress award mula sa Gawad Urian noong 2016 para sa pelikulang ‘Anino Sa Likod Ng Buwan.’

***

BALIK sa pagiging kontrabida si Kyline Alcantara sa upcoming adaptation of the hit K-drama ‘Shining Inheritance.’

Sa teaser video ng naturang teleserye, makikita na agad ang look at ano ang magiging character ni Kyline na siyang magiging hadlang sa buhay ng character ni Kate Valdez.

Huli nga raw nagkontrabida si Kyline ay sa ‘Kambal Karibal’ noong 2018 pa. Kaya muling nilabas ng Sparkle star ang kanyang husay sa pagmamaldita.

“So nice to be back!” sey ni Kyline na ang co-stars ay sina Paul Salas, Michael Sager and Ms. Coney Reyes.

Ang mga original stars ng Koreanoveka na ‘Shining Inheritance’ ay sina Lee Seung Gi, Han Hyo Joo, Moon Chae Won, and Bae Soo Bin.

***

OFFICIALY break na si Mariah Carey sa boyfriend niyang si Bryan Tanaka.

Fourteen years ang age gap ng Queen of Christmas sa kanyang dancer-boyfriend na nakarelasyon niya since 2016.

Ayon sa Page Six, pinag-awayan daw nila ay tungkol sa pagkakaroon ng anak: “Bryan wants to have a family. That’s not where she is at. Mariah is 54 and already has twins Moroccan and Monroe who are both 12. Bryan wants to start having his own life.”

Kaya pala wala si Bryan sa mga naganap na Christmas shows ni Mariah dahil tapos na ang relasyon nila.