HUMANDUSAY ang duguang katawan ng dalawang construction worker matapos pagbabarilin ng nag-iisangt hindi kilalang suspek habang nakikipaglamay sa nakaburol na kapitbahay sa Caloocan City, Linggo ng madaling araw.

Dead-on-arrival sa Dr. Jose N. Rodriguez Memorial Hospital ang biktimang si alyas “Antonio”, 34, ng Phase 8 Barangay 176 Bagong Silang sanhi ng tama ng bala sa kanang dibdib samantalang nasawi rin habang nilalapatan ng lunas ang kanyang kalugar na si alyas “Jay”, 29, dahil sa tama ng bala sa kanang tadyang.

Ayon kay Caloocan police chief P/Col. Ruben Lacuesta, nasa burol ng namayapa nilang kapitbahay ang mga biktima at nakikipaglamay nang dumating ang suspek dakong alas-4:40 ng madaling araw saka pinagbabaril ang mga biktima bago mabilis na tumakas patungo sa main road ng Phase 8.

Kaagad namang nagresponde at nagsagawa ng follow up operation ang mga tauhan ng East Bagong Silang Police Sub-Station 13 subalit, nabigo silang madakip ang suspek.

Iniutos na ni Col. Lacuesta ang pagrerebisa sa mga kuha ng CCTV camera sa lugar at sa mga kalsadang tinakbuhan ng suspek na maaring makatulong para makilala ang salarin habang inaalam pa ang motibo insidente. (Richard Mesa)

TODAS ang 40-anyos na lalaki matapos pagbabarilin ng isa sa dalawang hindi kilalang suspek sa Malabon City, kamakalawa ng madaling araw.

Dead-on-the-spot ang biktimang si alyas “Ruel”, residente ng C, Perez St. Brgy. Tonsuya sanhi ng isang tama ng bala sa ulo habang mabilis namang tumakas ang mga suspek patungong Sanciangco St. sa naturan ding barangay matapos ang insidente.

Sa ulat nina P/MSg Ernie Baroy at P/MSg Diego Ngippol kay Malabon police chief P/Col. Jay Baybayan, dakong alas-12:30 ng madaling araw nang maganap ang insidente sa Pilapil St. Palmario 2, Brgy. Tonsuya.

Sa inisyal imbestigasyon ng pulisya, lumabas ng bahay ang biktima at nagtungo sa nasabing lugar nang dumating ang dalawang lalaki na kapwa nakasuot ng-jacket at naka-face mask.

Isa sa mga suspek ang bumunot ng baril at pinagbabaril ang biktima na nagresulta ng kanyang agarang kamatayan habang nakuha naman ng pulisya sa crime scene ang isang basyo ng bala ng cal. 45 baril.

Patuloy naman ang follow-up imbestigasyon ng pulisya para sa posibleng pagkilalan at pagkakadakip sa mga salarin habang inaalam pa ang motibo sa insidente. (Richard Mesa)

PINASISILIP ng ilang residente kay Taguig City Mayor Lani Cayetano ang umano’y walang habas na pagmumura at paninigaw  ng isang Kapitana ng isang  barangay sa mga kabataan sa Brgy. East Rembo.

Ito ay makaraang nag-viral ang isang video na inupload ng isang anonymous sender kung saan nagkaroon ng iringan  sa pagitan ng Kapitana ang mga residente sa lugar.

Sa kanilang reklamo, dumating si Kapitana sakay ng kanyang sasakyan nang nadaanan ang mga kabataan sa tapat ng kanilang bahay.

Bumaba ang kapitana at sinita umano ang mga kabataan na imbes na pakiusapan ng maayos ay pinalayas, pinagsisigawan, pinagmumura sila kasama ng kanyang asawa at anak na lalaki na nagawa pang sugurin ang mga kabataan habang pilit na inaawat.

Puna ng ilang residente, na  nagde-demand umano ito ng respeto pero siya mismo ay hindi naman niya maibigay sa kanyang mga nasasakupan.

Hiling lang sana ng mga residente lalo na ang mga nasaktan na kabataan na maging mabuting public servant si kapitana.

Sa mga komento, halos puro negatibo dahil tila hindi naaayon ang pag-asta nito bilang isang public servant  na direktang sumasagot ito imbes na ayusin ito.

Nanawagan na rin ang mga nasaktang partido sa Department of the Interior and Local Government (DILG) na aksyunan ang ganitong klase ng public servant.

Sa panig naman ng Kapitana, ikinatuwiran nito  na respetuhin siya at makinig sa kanya ang mga kabataan.

Binigyang-diin din niya na siya ang unang bumaba sa sasakyan at unang sumugod sa mga menor de edad na nasa kalsada at hindi ang kanyang mister. GENE ADSUARA