PINAYUHAN ni Navotas City Mayor John Rey Tiangco ang mga benepisyaryo ng Government Internship Program (GIP) na magsimula nang malakas at magtrabaho nang mahusay mula sa kanilang unang araw.

Sa kanyang mensahe sa GIP orientation, malugod na tinanggap ni Tiangco ang 20 benepisyaryo at pinaalalahanan sila na bumuo ng magandang ugali.

“By cultivating positive habits, we build good character that we will carry wherever our journey takes us. Through this, we also create a positive impact in our society. So, we should start strong from our first day at work,” aniya.

Ang mga intern ng GIP ay pinili mula sa isang grupo ng mga kwalipikadong aplikante. Ito ang ikalawang batch ng mga benepisyaryo para sa programa ngayong taon. Maglilingkod sila sa pamahalaang lungsod mula Mayo 16 hanggang Nobyembre 21, 2024 at tatanggap sila ng P610 na suweldo kada araw.

Ang GIP ay isang programa sa ilalim ng Department of Labor and Employment sa pakikipagtulungan ng Public Employment Service Office (PESO) Navotas, na naglalayong magbigay ng mga pagkakataon at makisali sa mga kabataang manggagawa sa larangan ng serbisyo publiko. (Richard Mesa)

BALIK-SELDA ang isang lalaki matapos holdapin at saktan pa ang 18-anyos na babaeng estudyante nang pumalag ang biktima sa Valenzuela City.

Kinilala ni P/Col. Allan Umipig, Officer-in-Charge (OIC) ng Valenzuela City Police ang suspek na si alyas Ramos, 29, ng Road 5, Hagdang Bato, Brgy., Marulas.

Sa imbestigasyon ni PSMS Regor Germedia, naglalakad ang biktimang si alyas Jhan, sa Ilang-Ilang St., Brgy., Marulas nang harangin ng suspek at pilit umanong inagaw ang kanyang cellphone at bag subalit, pumalag ang dalaga.

Naglabas ang suspek ng baril na replika at hinampas sa likod ang biktima saka nagpambuno ang mga ito bago inuntog pa ng holdaper sa semento ang dalaga hanggang maagaw ang kanyang cellphone.

Tumakas ang suspek habang nakahingi naman ng tulong ang biktima sa nagpapatrulyang mga tauhan ng Marulas Sub-Station 3 na nagresulta sa pagkakaaresto kay ‘Ramos’ at narekober sa kanya ang cellphone ng dalaga at ginamit na replika na baril.

Ani PSMS Germedia, si ‘Ramos’ ay nakulong ng walong taon sa Maximun Security Compound, New Bilibid Prison dahil sa mga kasong paglabag sa R.A. 9165, frustrated homicide, at robbery kung saan kalalabas lamang nito noong Marso 19, 2024.

Nasangkot din aniya ito sa sunod-sunod na kasong theft at robbery noong 2016 sa Barangay Marulas.

Ayon kay P/Cpt. Armando Delima, hepe ng Station Investigation and Detective Management Branch, si Ramos ay nahaharap sa kasong Robbery with Violence against or Intimidation of Persons at paglabag sa RA 10591. (Richard Mesa)

MALUGOD na tinanggap ng Pamahalaang Lungsod ng Navotas ang 20 benepisyaryo ng Government Internship Program (GIP) kung saan sa kanyang mensahe sa ginanap na GIP orientation, ay pinayuhan ni Mayor John Rey Tiangco ang mga ito na magsimula nang malakas at magtrabaho nang mahusay mula sa kanilang unang araw ng trabaho. (Richard Mesa)

NASAMSAM ng pulisya ang mahigit P1 milyong halaga ng Ilegal na droga sa tatlong drug suspects matapos maaresto sa magkahiwalay na drug operation sa Caloocan City.

Ayon kay Caloocan police chief P/Col. Ruben Lacuesta, ala-1:35 ng Lunes ng madaling araw, nagsasagawa ng foot patrol ang mga tauhan ng Cadena De Amor Police Sub-Station 11 sa Phase 3-B, Brgy., 175, Camarin nang mapansin nila ang dalawang lalaking nag-uusap at kalaunan ay may iniabot ang isa sa kanyang kausap na hinihinalang shabu kaya nilapitan nila ang mga ito.

Gayunman, nang mapansin ng mga suspek ang kanilang presensya ay nagtakbuhan ang mga ito kaya hinabol sila ng mga pulis hanggang makorner si alyas Jojo, 54.

Nang kapkapan, nakuha sa kanya ang isang knotted transparent plastic na naglalaman ng nasa 100.6 grams ng hinihinalang shabu na nagkakahalaga ng P684,080.00 habang nakatakas ang nag-abot sa kanya ng droga.

Dakong alas-3:09 ng Linggo ng madaling araw nang matimbog naman ng mga operatiba ng Station Drug Enforcement Unit sa buy bust operation sa Sampaguita St, Brgy. 175, sina alyas Boss, 18, ng Caloocan at at alyas Baliw, 27, ng Quezon City.

Nakumpiska sa kanila ang aabot 54.20 grams ng hinihinalang shabu na may katumbas na halagang P368,560 at buy bust money na isang P500 bill, kasama ang anim pirasong P1,000 boodle money.

Pinuri naman ni Northern Police District (NPD) Director P/BGen. Rizalito Gapas si Col. Lacuesta at kanyang mga tauhan sa kanilang matagumpay na drug operation kung saan nadakip ang mga suspek na mahaharap sa kasong paglabag sa RA 9165 o Comprehensive Dangerous Drug Act of 2002. (Richard Mesa)